കാസര്‍കോട്: കാഞ്ഞങ്ങാട് ദുര്‍ഗ ഹയര്‍ സെക്കന്‍ഡറി സ്‌കൂളിലെ 135-ാം നമ്പര്‍ പോളിങ് ബൂത്ത് ചരിത്ര മുഹൂര്‍ത്തത്തിന് സാക്ഷിയായി. ജില്ലയിലെ ഏക ട്രാന്‍സ്‌ജെന്‍ഡര്‍ വോട്ടര്‍ ആയ ഇഷാ കിഷോര്‍ വോട്ട് രേഖപ്പെടുത്തിയത് ഇവിടെയാണ്. ജില്ലയിലെ ആദ്യ ട്രാന്‍സ്‌ജെന്‍ഡര്‍ വോട്ടര്‍ കൂടിയാണിവര്‍.
വോട്ട് രേഖപ്പെടുത്തുന്നതിലൂടെ നാം നമ്മുടെ നിലപാടുകളാണ് വെളിപ്പെടുത്തുന്നതെന്ന് അവര്‍ പറഞ്ഞു.
'ജില്ലയില്‍ നിരവധി ട്രാന്‍സ്‌ജെന്‍ഡറുകള്‍ ഉണ്ടെങ്കിലും പലരും സ്വന്തം ഐഡന്റിറ്റി വെളിപ്പെടുത്തികൊണ്ട് മുന്നോട്ടു വരാന്‍ തയാറല്ല. സമൂഹം തന്നെയാണ് അതിനുകാരണം. അടുത്ത തെരഞ്ഞെടുപ്പ് ആകുമ്പോഴേക്കും കൂടുതല്‍ ട്രാന്‍സ്‌ജെന്‍ഡര്‍ വോട്ടര്‍മാര്‍ മുന്നോട്ടുവരുമെന്നാണ് പ്രതീക്ഷയെന്നും ഇഷ പറഞ്ഞു. കാഞ്ഞങ്ങാട് സ്വദേശിയായ ഇഷ പ്രാദേശിക വാര്‍ത്താ ചാനലില്‍ വാര്‍ത്താ അവതാരകയാണ്.