മട്ടാഞ്ചേരി: ഫോര്‍ട്ടുകൊച്ചി കമാല കടവില്‍ പതിനൊന്ന് ജീവനുകള്‍ കവര്‍ന്ന ബോട്ടപകടത്തിന് മൂന്ന് വയസ്.
നാട് ഓണാഘോഷ ലഹരിയിലമര്‍ന്ന വേളയിലായിരുന്നു മത്സ്യബന്ധനയാനത്തിന്റെ ഇടിയേറ്റ് ഫോര്‍ട്ടുകൊച്ചി വൈപ്പിന്‍ സര്‍വീസ് നടത്തിയിരുന്ന എം.വി ഭാരത് എന്ന ബോട്ട് നെടുകെ പിളര്‍ന്ന് മുങ്ങി താഴ്ന്നത്.
വെപ്പിനില്‍ നിന്ന് ഫോര്‍ട്ടുകൊച്ചിക്ക് പുറപ്പെട്ട ബോട്ട് ഉച്ചയ്ക്ക് ഒന്നരയ്ക്ക് ജെട്ടിക്ക് വാരകള്‍ക്കകലെ വെച്ചാണ് ദുരന്തത്തില്‍പ്പെട്ടത്.
ജെട്ടിക്ക് സമീപത്തെ പമ്പില്‍ നിന്ന് ഇന്ധനം നിറച്ച് അലക്ഷ്യമായി അമിത വേഗതയിലെത്തിയ ഇന്‍ബോര്‍ഡ് വള്ളമാണ് യാത്രാബോട്ടിനെ പിളര്‍ത്തി മുക്കി താഴ്ത്തിയത്. 38 യാത്രക്കാരുണ്ടായിരുന്ന ബോട്ടില്‍ നിന്ന് 27 പേരെ രണ്ടുവിദേശികളും നാട്ടുകാരുമടക്കമുള്ളവര്‍ രക്ഷപ്പെടുത്തി .
ദുരന്തദിനത്തില്‍ ആറ് പേരുടെ മൃതദേഹം കണ്ടെത്തുകയും മറ്റ് നാലെണ്ണം തുടര്‍ ദിനങ്ങളില്‍ ലഭിക്കുകയുമാണ് ചെയ്തത്. ഒരാള്‍ ആശുപത്രിയില്‍ വെച്ചം മരണപ്പെട്ടു. ദുരന്തത്തെ തുടര്‍ന്ന് ഓണാഘോഷ മടക്കമുള്ളവ ഒഴിവാക്കി കൊച്ചിക്കാര്‍ ദുരന്ത ദുഃഖം ഏറ്റുവാങ്ങി.
കൊച്ചി ബോട്ട് ദുരന്തത്തെ രാഷ്ട്രീയ കക്ഷികള്‍ പ്രചരണായുധമാക്കി തദ്ദേശ തിരഞ്ഞെടുപ്പില്‍ ഉയര്‍ത്തിയെങ്കിലും പിന്നിടിത് ദുരന്തം തന്നെ വിസ്മരിക്കപ്പെടുകയും ചെയ്തു. സാമുഹ്യസാംസ്‌ക്കാരിക സംഘടനകള്‍ ദുരന്തത്തെ ആദരാഞ്ജലിയിലുമൊതുക്കി.
സര്‍ക്കാര്‍ നഗരസഭാ ഭരണ കുടങ്ങള്‍ മരിച്ചവരുടെ കുടുംബത്തിന് ലക്ഷങ്ങള്‍ നല്കിയും പരുക്കേറ്റവര്‍ക്ക് പതിനായിരങ്ങള്‍ നിറപകിയും ഉത്തരവാദിത്വത്തില്‍ നിന്ന് രക്ഷപ്പെട്ടു.
പൊലീസ് എ.ഡി.ജി.പിയടക്കമുള്ള വിവിധ തല ഏജന്‍സികള്‍ കൊച്ചി ബോട്ട് ദുരന്തത്തെ കുറിച്ച് നടത്തിയ അന്വേഷണങ്ങള്‍ പ്രഹസനമാകുകയും യാത്രാബോട്ടിന്റെ കാലപഴക്കം ചുണ്ടിക്കാട്ടി റിപ്പോര്‍ട്ട് സമര്‍പ്പിക്കുകയും ചെയ്തു.