തലശ്ശേരി: മത്സ്യവാഹനമെന്ന വ്യാജേന കടത്തിയ നാലര കിലോ കഞ്ചാവ് നാട്ടുകാര്‍ പിടികൂടി എക്‌സൈസിനെ ഏല്‍പിച്ചു. ഒരാളെ അറസ്റ്റ് ചെയ്തു. മറ്റൊരാള്‍ സമീപത്തെ പുഴയില്‍ചാടി രക്ഷപ്പെട്ടു. ഇന്നലെ രാവിലെ 9.15ന് കൊടുവള്ളി പുതിയപാലത്തിനു സമീപം പേള്‍വ്യൂ ഹോട്ടലിന് എതിര്‍വശത്തു വച്ചായിരുന്നു സംഭവം. കാസര്‍കോട് മഞ്ചേശ്വരം മൂമ്പോടി ശാരദാ നഗറിര്‍ സ്വദേശി കിരണിനെയാണ് (26) നാട്ടുകാര്‍ പിടികൂടിയത്. കൂടെയുണ്ടായിരുന്ന ഉപ്പള സ്വദേശി ബിപിന്‍ പുഴയില്‍ ചാടി രക്ഷപ്പെട്ടു. തലശ്ശേരി സ്വദേശികളായ ഇടനിലക്കാര്‍ക്കു വേണ്ടിയാണ് കഞ്ചാവ് എത്തിച്ചതെന്ന് അന്വേഷണത്തില്‍ വ്യക്തമായിട്ടുണ്ടെന്ന് എക്‌സൈസ് ഉദ്യോഗസ്ഥര്‍ പറഞ്ഞു.