കൊണ്ടോട്ടി: കൊണ്ടോട്ടിയിലും പരിസരങ്ങളിലും മൊബൈല്‍ഫോണില്‍ ആവശ്യക്കാര്‍ക്ക് മദ്യം എത്തിച്ചുനല്‍കുന്ന കൊണ്ടോട്ടി സ്വദേശി ഓങ്ങല്ലൂര്‍ അശോക(32) നെ മലപ്പുറം എക്‌സൈസ് സംഘം പിടികൂടി. ഇയാളില്‍ നിന്ന് 4.5 ലിറ്റര്‍ മദ്യം പിടിച്ചെടുത്തു.
വര്‍ഷങ്ങളായി രഹസ്യമായി മദ്യവില്പന നടത്തുകയായിരുന്ന ഇയാള്‍ എക്‌സൈസ് സംഘത്തിന്റെ നിരീക്ഷണത്തിനായിരുന്നു. എക്‌സൈസ് വിഭാഗം ആവശ്യക്കാരന്‍ എന്ന വ്യാജേന ഫോണില്‍ വിളിച്ച് സാധനം ആവശ്യപ്പെട്ട് കൊണ്ടുവരുന്ന വഴിയിലാണ് പിടിയിലായത്. ബാറുകള്‍ അടച്ചതോടെയാണ് ഇയാളുടെ മൊബൈല്‍ വില്‍പന തകൃതിയായത്. ഒരു കുപ്പി (500 മില്ലി) മദ്യത്തിന് 150 മുതല്‍ 200 രൂപ വരെ ആവശ്യക്കാരില്‍ നിന്ന് കൂടുതല്‍ വാങ്ങിയാണ് കച്ചവടം. പ്രതി അശോകനെ മലപ്പുറം കോടതി റിമാന്റ് ചെയ്ത് മഞ്ചേരി സബ്ജയിലില്‍ അയച്ചു.
എക്‌സൈസ് ഇന്‍സ്‌പെക്ടര്‍ ടി. എന്‍. സുധീര്‍, പ്രിവന്റീവ് ഓഫീസര്‍ അനീഷ് കുമാര്‍ പുത്തില്ലന്‍, സി. ഇ. ഒ. മാരായ ജ്യോതിഷ് ചന്ദ്, അരവിന്ദന്‍, പ്രശാന്ത്, പ്രമോദ് ദാസ് എന്നിവര്‍ സംഘത്തിലുണ്ടായിരുന്നു.