കോഴിക്കോട്: മുഖ്യമന്ത്രിയുടെ രാജി അനിവാര്യമാണെന്നും ഇന്ന് അദ്ദേഹത്തിന് രാജിവെക്കാന്‍ പറ്റിയ ദിവസമാണിന്നെന്നും ബി.ജെ.പി സംസ്ഥാന അധ്യക്ഷന്‍ കെ. സുരേന്ദ്രന്‍. മുഖ്യമന്ത്രിയുടെ രാജി ആവശ്യപ്പെട്ട് കോഴിക്കോട്ട് ബിജെപി നടത്തി വരുന്ന ഉപവാസ സമരത്തില്‍ സംസാരിക്കുകയായിരുന്നു അദ്ദേഹം.

കള്ളകടത്ത് കേസില്‍ മുഖ്യമന്ത്രിയുടെ ഓഫീസ് മാത്രമല്ല എ.കെ.ജി സെന്ററും ഭാഗമാണ്. അനൂപ് മുഹമ്മദും സംഘവും നടത്തിയ മയക്കുമരുന്ന് കേസില്‍ സി.പി.എം സംസ്ഥാന സെക്രട്ടറിയുടെ മകനെക്കുറിച്ച് എന്താണ് പാര്‍ട്ടി ഒന്നും മിണ്ടാത്തത്. ചില അശ്ലീല ഇടപാടുകള്‍ വന്നപ്പോള്‍ മക്കള്‍ ചെയ്യുന്ന പ്രവൃത്തികള്‍ക്ക് പാര്‍ട്ടി മറുപടി പറയേണ്ട കാര്യമില്ലെന്നാണ് പറഞ്ഞത്. എന്നാല്‍ ഇത് രാജ്യ സുരക്ഷയെ തന്നെ ബാധിക്കുന്ന കാര്യമാണ്.

ബിനീഷ് കോടിയേരി അനൂപിന്റെ ബിനാമി മാത്രമാണ്. ഇടപാടില്‍ സാമ്പത്തിക സഹായം നല്‍കിയത് ബിനീഷ് കോടിയേരിയാണെന്ന് അനൂപ് മുഹമ്മദ് മൊഴി നല്‍കിയിട്ടുണ്ട്. ഹോട്ടല്‍ തുടങ്ങാന്‍ മാത്രമാണ് പണം നല്‍കിയതെന്ന ബിനീഷിന്റെ വാദം അവിശ്വസനീയമാണ്. 2012 മുതല്‍ അനൂപ് മുഹമ്മദും സംഘവും നടത്തിക്കൊണ്ടിരിക്കുന്ന മയക്കുമരുന്ന് കടത്തിന്റെ വിവരം കോടതിയില്‍ ഹാജരാക്കിയിട്ടുണ്ട്.

സ്വപ്ന അറസ്റ്റിലായ ദിവസം അനൂപിനെ ബിനീഷ് നിരന്തരമായി ബന്ധപ്പെട്ടിരുന്നു. സ്വര്‍ണക്കള്ളക്കടത്ത് കേസിലെ പ്രതി റമീസുമായും അനൂപിന് അടുത്ത ബന്ധമാണുള്ളത്. പ്രതികളെ ഒളിപ്പിക്കാന്‍ എ.കെ.ജി സെന്റര്‍ സഹായിച്ചുവെന്നതാണ് ഇത് വ്യക്തമാക്കുന്നതെന്നും കെ. സുരേന്ദ്രന്‍ കൂട്ടിച്ചേര്‍ത്തു.