ആലക്കോട്: തേര്‍ത്തല്ലി ടൗണിലെ റോഡ് നിര്‍മാണം ഇഴഞ്ഞുനീങ്ങുന്നു. മലയോര ഹൈവേ നിര്‍മാണത്തിന് സ്ഥലം വിട്ടുനല്‍കുന്നതില്‍ ചിലര്‍ കാലതാമസം വരുത്തിയതാണ് ഇപ്പോഴത്തെ പ്രതിസന്ധിക്ക് കാരണം. കോടികള്‍ ചെലവഴിച്ചു നിര്‍മിക്കുന്ന മലയോര ഹൈവേയുടെ പ്രവൃത്തികള്‍ 90 ശതമാനവും പൂര്‍ത്തിയായപ്പോഴാണ് തേര്‍ത്തല്ലി ടൗണില്‍ മാത്രം നിര്‍മാണം വൈകുന്നത്. ഹൈവേയുടെ വീതി 12 മീറ്റര്‍ ആണെങ്കിലും ടൗണ്‍ പ്രദേശത്ത് 13 മുതല്‍ 15 മീറ്റര്‍ വരെ വീതിയിലാണ് റോഡ് നിര്‍മിക്കുന്നത്. ചെറുപുഴ, മേരിഗിരി എന്നിവിടങ്ങളിലേക്ക് തിരിയുന്ന കവലയില്‍ 15 മീറ്ററും ടൗണിന്റെ മറ്റു ഭാഗങ്ങളില്‍ 13 മീറ്ററും വേണമെന്ന ഭൂരിപക്ഷ അഭിപ്രായത്തെ തുടര്‍ന്നാണ് സ്ഥലം ഏറ്റെടുക്കല്‍ വൈകിയത്. കെ.സി ജോസഫ് എം.എല്‍.എ രാഷ്ട്രീയ പാര്‍ട്ടി പ്രതിനിധികളുടെയും വ്യാപാരികളുടെയും സ്ഥലമുടമകളുടെയും യോഗം വിളിച്ചതിന് ശേഷമാണ് സ്ഥലം വിട്ടുനല്‍കാന്‍ ഉടമകള്‍ തയാറായത്. ആവശ്യത്തിന് സ്ഥലം ലഭ്യമായപ്പോഴേക്കും മഴയെത്തി. ഇതോടെ നിര്‍മാണം നിര്‍ത്തിവയ്ക്കാന്‍ കരാറുകാര്‍ നിര്‍ബന്ധിതരായി. ഓവുചാലുകളുടെ നിര്‍മാണം ഏതാണ്ട് പൂര്‍ത്തിയായെങ്കിലും റോഡ് വെട്ടിപ്പൊളിച്ചിരിക്കുന്നതാണ് നാട്ടുകാരെ ദുരിതത്തിലാക്കുന്നത്. കുണ്ടും കുഴിയുമായ ഭാഗത്തുകൂടി വാഹനങ്ങള്‍ ഏറെ പ്രയാസപ്പെട്ടാണ് കടന്നുപോകുന്നത്. വ്യാപാര സ്ഥാപനങ്ങളിലേക്കുള്ള വഴിയും തടസപ്പെട്ടതോടെ വ്യാപാരികളും ബുദ്ധിമുട്ടിലാണ്. മഴ കുറഞ്ഞതോടെ ഓവുചാല്‍ പ്രവൃത്തി പുനരാരംഭിച്ചതാണ് അല്‍പമെങ്കിലും ആശ്വാസം. മഴ മാറുന്നതോടെയെങ്കിലും മാസങ്ങളായുള്ള ദുരിതത്തിന് പരിഹാരമുണ്ടാകുമെന്ന പ്രതീഷയിലാണ് വ്യാപാരികളും നാട്ടുകാരും.