ബൈറൂത്ത്: 191 പേരുടെ മരണത്തിനിടയാക്കിയ സ്‌ഫോടനത്തിന്റെ ആഘാതം വിട്ടുമാറുന്നതിനു മുമ്പേ ലബ്‌നാന്‍ തലസ്ഥാനമായ ബൈറൂത്തില്‍ മറ്റൊരു വന്‍ തീപിടിത്തം.
തുറമുഖത്തെ നികുതിരഹിത ഭാഗത്ത് എണ്ണയും ടയറുകളും സൂക്ഷിച്ച വെയര്‍ഹൗസിലാണ് തീപിടിത്തമുണ്ടായതെന്ന് സൈന്യം അറിയിച്ചു. സൈനിക ഹെലികോപ്റ്ററുകളുപയോഗിച്ച് തീ കെടുത്താനുള്ള യത്‌നം തുടരുകയാണ്.
ഓഗസ്റ്റ് നാലിനുണ്ടായ സ്‌ഫോടനത്തിനു ശേഷം രണ്ടുദിവസം മുമ്പും ഇവിടെ അഗ്നിബാധ ഉണ്ടായിരുന്നു. എന്നാല്‍ ഇന്നലത്തെ തീപിടിത്തത്തില്‍ അഗ്നിജ്വാലകളും കട്ടിയുള്ള പുകയും ആകാശത്തോളം ഉയര്‍ന്നതായി വിഡിയോ ദൃശ്യങ്ങള്‍ വ്യക്തമാക്കുന്നു. വെയര്‍ഹൗസില്‍ സൂക്ഷിച്ചിരുന്ന 2,750 ടണ്‍ അമോണിയം നൈട്രേറ്റ് ശേഖരമായിരുന്നു ഒരു മാസം മുമ്പ് നഗരത്തെ ഭാഗികമായി ചാരമാക്കിയത്.