കൊണ്ടോട്ടി: ഹജ്ജ് മടക്കയാത്ര വിലയിരുത്താന്‍ സംസ്ഥാന ഹജ്ജ് കമ്മിറ്റി യോഗം നാലിനു വൈകിട്ട് നാലിനു കരിപ്പൂര്‍ ഹജ്ജ് ഹൗസില്‍ ചേരും. പുതിയ കമ്മിറ്റി അധികാരത്തിലേറിയതിനു ശേഷമുള്ള അംഗങ്ങളുടെ ആദ്യ യോഗംകൂടിയാണിത്.ഹജ്ജ് കമ്മിറ്റി ചെയര്‍മാന്‍ സി. മുഹമ്മദ് ഫൈസി അധ്യക്ഷനാകും. 12 മുതലാണ് ഹജ്ജ് മടക്ക സര്‍വിസുകള്‍ ആരംഭിക്കുന്നത്.
ഇവ നെടുമ്പാശ്ശേരിയില്‍നിന്നു നടത്താനാണ് ഒരുങ്ങുന്നത്. 12 മുതല്‍ 26 വരെയായി 29 വിമാനങ്ങളാണ് മടക്ക സര്‍വിസുകള്‍ക്കായി ക്രമീകരിച്ചിരിക്കുന്നത്. മദീനയില്‍നിന്നാണ് ഹജ്ജ്് വിമാനങ്ങള്‍ നെടുമ്പാശ്ശേരിയിലേക്കു പുറപ്പെടുക.
ആദ്യ ദിനത്തില്‍ രണ്ടു വിമാനങ്ങളാണുള്ളത്.
13ന് ഒരു വിമാനവും സര്‍വിസ് നടത്തും. 14നു വിമാനങ്ങളില്ല. 15, 18, 19, 23 തിയതികളില്‍ മൂന്നു വിമാനങ്ങളും 16, 22, 25, 26 തിയതികളില്‍ രണ്ടു വിമാനങ്ങളുമുണ്ടാകും. 17, 21, 24 തിയതികളില്‍ ഓരോ വിമാനവും സര്‍വിസ് നടത്തും. ഹജ്ജിന് ആദ്യം പോയ വിമാനങ്ങളിലെ തീര്‍ഥാടകരാണ് ആദ്യം തിരിച്ചെത്തുക.
മടങ്ങിയെത്തുന്ന തീര്‍ഥാടകര്‍ക്ക് അഞ്ചു ലിറ്റര്‍ സംസം തീര്‍ഥജലം വിമാനത്താവളത്തില്‍വച്ചു കൈമാറും. ഇതു നേരത്തേതന്നെ നെടുമ്പാശ്ശേരിയില്‍ എത്തിച്ചിട്ടുണ്ട്.
തീര്‍ഥാടകരെ സഹായിക്കാനായി വളണ്ടിയര്‍മാരുടെ സേവനവും ലഭ്യമാക്കും. 23 കുട്ടികള്‍ ഉള്‍പ്പെടെ 12,013 പേരാണ് ഈ വര്‍ഷം കേരളത്തില്‍നിന്നു ഹജ്ജിനു പോയത്. ഇവരില്‍ 277 പേര്‍ ലക്ഷദ്വീപില്‍നിന്നുള്ളവരും 47 പേര്‍ മാഹിയില്‍നിന്നുള്ളവരുമാണ്.