തിരുവനന്തപുരം: ഇത്തവണത്തെ കേരള എന്‍ജിനീയറിങ്, ഫാര്‍മസി പ്രവേശന പരീക്ഷകള്‍ (കീം 2019) സമാപിച്ചു. ഇന്നലെ നടന്ന കണക്കുപരീക്ഷയോടെയാണ് രണ്ടുദിവസങ്ങളിലായി നടന്ന പരീക്ഷകള്‍ അവസാനിച്ചത്. വ്യാഴാഴ്ച ഫിസിക്‌സ്, കെമിസ്ട്രി വിഷയങ്ങളുടെ പരീക്ഷ നടന്നിരുന്നു.
എന്‍ജിനിയറിങ്ങിന് 93,467 പേരും ഫാര്‍മസിക്ക് 64,289 പേരും ഉള്‍പ്പെടെ 1,57,756 വിദ്യാര്‍ഥികളാണ് ഇക്കൊല്ലം പ്രവേശന പരീക്ഷ എഴുതിയത്. കണക്ക് പരീക്ഷയാണ് ഇന്നലെ നടന്നത്. രാവിലെ 10ന് ആരംഭിച്ച പരീക്ഷ 12.30ന് അവസാനിച്ചു.

രണ്ടുദിവസങ്ങളിലേയും പരീക്ഷകള്‍ പൊതുവേ എളുപ്പമായിരുന്നുവെന്ന് വിദ്യാര്‍ഥികള്‍ പറയുന്നു. ഇന്നലെ നടന്ന കണക്ക് പരീക്ഷ ഒട്ടുമിക്കവര്‍ക്കും എളുപ്പമായിരുന്നു. ഫിസിക്‌സും നന്നായി ചെയ്യാന്‍ പറ്റിയെന്ന് വിദ്യാര്‍ഥികള്‍ പ്രതികരിച്ചു.

കെമിസ്ട്രി മാത്രമായിരുന്നു കുറച്ചെങ്കിലും വിഷമം. എന്നാല്‍ കഴിഞ്ഞ തവണത്തെ അപേക്ഷിച്ച് ഇത്തവണ പരീക്ഷകള്‍ പൊതുവെ എളുപ്പമായിരുന്നെന്നും വിദ്യാര്‍ഥികള്‍ പ്രതികരിച്ചു.
പ്രവേശന പരീക്ഷയുടെയും യോഗ്യതാ പരീക്ഷയിലെ ഫിസിക്‌സ്, കെമിസ്ട്രി, കണക്ക് പരീക്ഷകളുടെയും അടിസ്ഥാനത്തിലാണ് റാങ്ക് പട്ടിക തയ്യാറാക്കുക. മൂല്യനിര്‍ണയം ഉടന്‍ ആരംഭിക്കുമെന്ന് എന്‍ട്രന്‍സ് കമ്മിഷണര്‍ എ. ഗീത പറഞ്ഞു. സംസ്ഥാനത്തെ 14 ജില്ലാ കേന്ദ്രങ്ങള്‍ക്ക് പുറമേ ദുബായ്, മുംബൈ, ഡല്‍ഹി എന്നിവിടങ്ങളിലായി 330 കേന്ദ്രങ്ങളിലാണ് പരീക്ഷ നടന്നത്.