ഗസ്സ: ഇസ്‌റാഈലില്‍ ബെഞ്ചമിന്‍ നെതന്യാഹു വീണ്ടും അധികാരത്തിലെത്തിയതോടെ ഫലസ്തീനില്‍ ഇസ്‌റാഈല്‍ സൈന്യം ആക്രമണങ്ങള്‍ തുടങ്ങി. ഇന്നലെ ഗസ്സയില്‍ ഇസ്‌റാഈല്‍ നടത്തിയ വ്യോമാക്രമണത്തില്‍ ഒരു ഫലസ്തീനി യുവാവ് കൊല്ലപ്പെട്ടു. വെള്ളിയാഴ്ച രണ്ടു വ്യത്യസ്ത സംഭവങ്ങളിലായി നാലു ഫലസ്തീനികള്‍ ഇസ്‌റാഈല്‍ ആക്രമണത്തില്‍ കൊല്ലപ്പെട്ടിരുന്നു. ഇമാദ് എന്‍സീര്‍ എന്ന 22കാരനാണ് ഇന്നലെ കൊല്ലപ്പെട്ടത്. നാലു ഫലസ്തീനികള്‍ക്കു പരുക്കേറ്റതായും ഗസ്സയിലെ ആരോഗ്യ വകുപ്പ് ഉദ്യോഗസ്ഥര്‍ പറഞ്ഞു.
ഇസ്രാഈല്‍ ബോംബാക്രമണം നടത്തിയതിനു പ്രതികാരമായി ഹമാസ് ദക്ഷിണ ഇസ്‌റാഈലിലേക്ക് റോക്കറ്റുകള്‍ അയച്ചു. മൂന്നു ഇസ്‌റാഈലികള്‍ക്കു പരുക്കേറ്റതായി അല്‍ജസീറ റിപോര്‍ട്ടര്‍ ഹാരി ഫോക്കറ്റ് പറഞ്ഞു. ഈജിപ്തിന്റെ മധ്യസ്ഥതയില്‍ ഹമാസും ഇസ്‌റാഈലും തമ്മില്‍ നടന്ന അനുരഞ്ജന ചര്‍ച്ച പുരോഗമിച്ചുവരുന്നതിനിടെയാണ് മേഖലയില്‍ സംഘര്‍ഷാന്തരീക്ഷം വീണ്ടും രൂപപ്പെട്ടത്.
ഗസ്സ മുനമ്പില്‍നിന്ന് 90 റോക്കറ്റുകള്‍ വന്നതായി ഇസ്‌റാഈല്‍ സൈന്യം അറിയിച്ചു. എല്ലാം മിസൈല്‍വേധ പ്രതിരോധ സംവിധാനമുപയോഗിച്ച് തകര്‍ത്തതായും സൈന്യം അവകാശപ്പെട്ടു. അതേസമയം ബയ്ത്ത് ഹനോനിലെ കൃഷിയിടങ്ങളെയാണ് ഇസ്‌റാഈല്‍ പ്രധാനമായും ഉന്നംവച്ചതെന്ന് ഫലസ്തീന്‍ വാര്‍ത്താ ഏജന്‍സി അറിയിച്ചു. ഗസ്സ വേലിയില്‍നിന്നും ഇസ്രാഈല്‍ സേന ഖാന്‍യൂനുസിലെ നിരീക്ഷണ ഔട്ട്‌പോസ്റ്റുകളിലേക്ക് ഷെല്‍ വര്‍ഷം നടത്തിയതായി ഫലസ്തീന്‍ അധികൃതര്‍ പറഞ്ഞു.