കണ്ണൂര്‍: കണ്ണൂര്‍ ലോക്‌സഭാ മണ്ഡലത്തിലെ പാമ്പുരുത്തി യു.പി സ്‌കൂളില്‍ കള്ളവോട്ട് ചെയ്‌തെന്ന പരാതിയില്‍ 12 മുസ്‌ലിംലീഗ് പ്രവര്‍ത്തകര്‍ക്ക് തെരഞ്ഞെടുപ്പ് കമ്മിഷന്റെ നോട്ടിസ്. തെളിവെടുപ്പിന്റെ ഭാഗമായി ഇന്ന് രാവിലെ 10ന് കലക്ടര്‍ മുന്‍പാകെ നേരിട്ട് ഹാജരാകണമെന്നാണ് നിര്‍ദേശം. കെ. അനസ്, എം.പി ഷമല്‍, എം. അബ്ദുസലാം, എം. മുബഷിര്‍, എം.പി അസ്‌ലം, കെ.പി സാദിഖ്, കെ.പി ഉനൈസ്, കെ.പി മര്‍ഷദ്, കെ.പി ആഷിഖ്, വി.ടി യൂനുസ്, വി.ടി മുസ്തഫ എന്നിവര്‍ക്കാണ് കലക്ടര്‍ നോട്ടിസ് അയച്ചത്.
തളിപ്പറമ്പ് നിയമസഭാ മണ്ഡലത്തിലെ 166ാം നമ്പര്‍ ബൂത്തില്‍ കള്ളവോട്ട് നടന്നുവെന്ന പരാതിയെ തുടര്‍ന്ന് ശനിയാഴ്ച വോട്ടെടുപ്പിന്റെ ദൃശ്യങ്ങള്‍ പരിശോധിച്ചിരുന്നു. പാമ്പുരുത്തിയില്‍ ലീഗ് പ്രവര്‍ത്തകര്‍ കള്ളവോട്ട് ചെയ്തുവെന്ന് ആരോപിച്ച് സി.പി.എം പരാതി നല്‍കുകയും ഇതിനു തെളിവായി വിഡിയോ ദൃശ്യങ്ങള്‍ പുറത്തുവിടുകയും ചെയ്തിരുന്നു. എന്നാല്‍, ലീഗ് നേതൃത്വം ആരോപണം നിഷേധിച്ചിരുന്നു.