ബംഗളൂരു: ട്രെയിന്‍ വൈകിയതിനാല്‍ 200 കുട്ടികള്‍ക്ക് പരീക്ഷയെഴുതാനായില്ല. കര്‍ണാടകത്തിലാണ് സംഭവം.
നീറ്റ് പരീക്ഷ എഴുതാനെത്തിയ അഞ്ഞൂറോളം കുട്ടികള്‍ക്കാണ് ട്രെയിന്‍ ആറു മണിക്കൂര്‍ വൈകിയതിനാല്‍ പരീക്ഷയെഴുതാനാകാതെ പോയത്. നോര്‍ത്ത് കര്‍ണാടകയില്‍നിന്ന് ബംഗളൂരുവിലേക്കുള്ള ഹംപി എക്‌സ്പ്രസിലാണ് സംഭവം. ഉച്ചക്ക് 1.30 നായിരുന്നു വിദ്യാര്‍ഥികള്‍ക്ക് പരീക്ഷാ ഹാളിലെത്തേണ്ടിയിരുന്നത്. എന്നാല്‍ ട്രെയിന്‍ 2.30 ന് മാത്രമാണ് ബംഗളൂരുവിലെത്തുന്നത്.
വര്‍ഷത്തിലൊരിക്കല്‍ മാത്രം നടത്തുന്ന ഈ പ്രവേശന പരീക്ഷ ട്രെയിന്‍ വൈകിയതിനാല്‍ എഴുതാനാകാതെ പോയത് ഇരുന്നൂറോളം വിദ്യാര്‍ഥികള്‍ക്കാണ്. രാജ്യത്ത് 13 ലക്ഷം വിദ്യാര്‍ഥികളാണ് നീറ്റ് എഴുതുന്നത്. ഈ കുട്ടികള്‍ക്ക് പരീക്ഷയെഴുതാന്‍ ഒരവസരം കൂടി നല്‍കണമെന്നാവശ്യപ്പെട്ട് മുന്‍ കര്‍ണാടക മുഖ്യമന്ത്രി സിദ്ധരാമയ്യയുള്‍പ്പടെയുള്ളവര്‍ രംഗത്തെത്തിയിട്ടുണ്ട്.