തേഞ്ഞിപ്പലം: പ്രളയ ദുരിതം മൂലം പഠനോപകരണങ്ങള്‍ നഷ്ടപ്പെട്ട വിദ്യാര്‍ഥികള്‍ക്ക് വിദ്യാര്‍ഥികളുടെ കൈകരുത്തില്‍ പിറന്നത് 5,000 നോട്ടുബുക്കുകള്‍. പഠനോപകരണങ്ങള്‍ നഷ്ടപ്പെട്ട വിദ്യാര്‍ഥികള്‍ക്ക് ബുക്കുകളും പഠന സാമഗ്രികളും എത്തിച്ചു കൊടുക്കുന്ന വി.എച്ച്.എസ്.ഇ എന്‍.എസ്.എസിന്റെ 'സ്‌നേഹാക്ഷരം' പദ്ധതിയുടെ ഭാഗമായാണ് ചേളാരി ഗവ.വൊക്കേഷനല്‍ ഹയര്‍ സെക്കന്‍ഡറി സ്‌കൂള്‍ വി.എച്ച്.എസ്.ഇ എന്‍.എസ്.എസും പ്രിന്റിങ് ടെക്‌നോളജി വിദ്യാര്‍ഥികളുമാണ് നോട്ടുബുക്കുകള്‍ നിര്‍മിച്ചത്.
'സ്‌നേഹാക്ഷരം' നോട്ടുബുക്ക് സ്‌കൂളില്‍ നടന്ന ചടങ്ങില്‍ പി. അബ്ദുല്‍ ഹമീദ് എം.എല്‍.എ, വി.എച്ച്.എസ്.ഇ അസി. ഡയറക്ടര്‍ എം.ഉബൈദുള്ളക്ക് കൈമാറി പ്രകാശനം ചെയ്തു.
എന്‍.എസ്.എസ് ജില്ലാ കോഡിനേറ്റര്‍ പി.കെ സ്മിത എം.എല്‍.എയില്‍ നിന്നും ബുക്കുകള്‍ ഏറ്റുവാങ്ങി. പി.ടി.എ പ്രസിഡന്റ് വി.എം ഹുസൈന്‍ അധ്യക്ഷനായി. വി.എച്ച് എസ്.ഇ പ്രിന്‍സിപ്പല്‍ എ. ജിനേഷ്, എന്‍.എസ്.എസ് പ്രോഗ്രാം ഓഫിസര്‍ എം. പ്രസാദ്, തേഞ്ഞിപ്പലംപഞ്ചായത്ത് പ്രസിഡന്റ് സഫിയ റസാഖ്, തിരൂരങ്ങാടി ബ്ലോക്ക് പഞ്ചായത്തംഗം എം.വിജയന്‍, പ്രിന്‍സിപ്പല്‍ ടി.വിജയന്‍, ഹെഡ്മിസ്ട്രസ് കെ.ടി വൃന്ദ കുമാരി, എ.പി സലീം തുടങ്ങിയവര്‍ സംസാരിച്ചു.