കണ്ണൂര്‍: വെള്ളിവിളക്കും അംശവടിയുമേന്തി സുല്‍ത്താന്‍ ആദിരാജ മറിയുമ്മ എന്ന ചെറിയ ബീകുഞ്ഞി ബീവി അറക്കല്‍ രാജവംശത്തിന്റെ നാല്‍പതാമത് അധികാരിയായി. അറക്കല്‍ രാജവംശത്തിന്റെ 39ാമത് ആദിരാജ ഫാത്തിമ മുത്തുബീവിയുടെ വിയോഗത്തെ തുടര്‍ന്നാണു കണ്ണൂര്‍സിറ്റി അറക്കല്‍ കെട്ടിനകത്തെ സ്വവസതിയായ അല്‍മാര്‍ മഹലില്‍ നടന്ന ലളിതമായ ചടങ്ങില്‍ ആദിരാജ മറിയുമ്മ കേരളത്തിലെ ഏക മുസ്‌ലിം രാജവംശത്തിന്റെ രാജസ്വരൂപം ചൂടിയത്. പുരാവസ്തു വകുപ്പ് മന്ത്രി കടന്നപ്പള്ളി രാമചന്ദ്രനും രാജകുടുംബാംഗങ്ങളും പാണക്കാട് കുടുംബവും സാക്ഷികളായി.
ആചാര വാളുകളും അറക്കല്‍ രേഖകളും അറക്കല്‍ പണ്ടാര വസ്തുക്കളുടെ താക്കോല്‍ കൂട്ടങ്ങളും പുതിയ ബീവിയുടെ മകന്‍ ആദിരാജ അബ്ദുല്‍ഷുക്കൂര്‍ സ്ഥാനിയായിരുന്ന പരേതയായ ഫാത്തിമ മുത്ത് ബീവിയുടെ മകള്‍ ഖദീജ സോഫിയ ആദിരാജയില്‍ ഏറ്റുവാങ്ങി. തുടര്‍ന്ന് അറക്കല്‍ ബീവിയുടെ സംരക്ഷരും പരിചാകരുമായി അറിയപ്പെടുന്ന പട്ടക്കാരുടെ സാന്നിധ്യത്തില്‍ പുതിയ ബീവിക്ക് ഇവര്‍ അംശവടി കൈമാറിയതോടെ ചടങ്ങ് പൂര്‍ത്തിയായി. ബീവിയുടെ പ്രതിനിധിയായി കണ്ണൂര്‍സിറ്റി ജുമാമസ്ജിദ് ഉള്‍പ്പെടെയുള്ള പൈതൃക സ്ഥാപനങ്ങളുടെ ഉത്തരവാദിത്തം വഹിച്ച പൗത്രന്‍ ആദിരാജ ഇംതിയാസ് അഹ്മദ്, അറക്കല്‍ മ്യൂസിയം ചെയര്‍മാന്‍ ആദിരാജ മുഹമ്മദ് റാഫി, സിയാദ് ആദിരാജ, അഷ്‌റഫ് ആദിരാജ, ബാബു ആദിരാജ, ആദിരാജ കോയമ്മ എന്നിവര്‍ ചടങ്ങുകള്‍ക്ക് നേതൃത്വം നല്‍കി. ലളിതമായ ഇഫ്താര്‍ വിരുന്നോടെ സ്ഥാനാരോഹണ പരിപാടികള്‍ പൂര്‍ത്തിയായി.

സ്ഥാനാരോഹണ ചടങ്ങില്‍ ആദിരാജ അബ്ദുല്‍ഷുക്കൂര്‍ അധ്യക്ഷനായി. അറക്കല്‍ രാജ കുടുംബത്തെ മുതിര്‍ന്ന മാധ്യമപ്രവര്‍ത്തകനും ഗവേഷകനുമായ സി.കെ.എ ജബ്ബാര്‍ പരിചയപ്പെടുത്തി. പാണക്കാട് ഹൈദരലി ശിഹാബ് തങ്ങളുടെ സന്ദേശം ഒ. ഉസ്മാനും ചെറിയ ബീകുഞ്ഞി ബീവിയുടെ സന്ദേശം മുഹമ്മദ് ഷിഹാദും വായിച്ചു.
ചിറക്കല്‍ കോവിലകത്ത് നിന്ന് രവീന്ദ്രവര്‍മ ഇളയരാജ, പാണക്കാട് സാലിഹ് ശിഹാബ് തങ്ങള്‍, ഹുസൈന്‍ ശിഹാബ് തങ്ങള്‍ പൊടിയാട്, സി.പി.എം ജില്ലാസെക്രട്ടറി എം.വി ജയരാജന്‍, ഡി.സി.സി അധ്യക്ഷന്‍ സതീശന്‍ പാച്ചേനി, പി. ജയരാജന്‍, സി. സമീര്‍, അഷ്‌റഫ് ബംഗാളി മുഹല്ല, ടി.എ തങ്ങള്‍, സത്യന്‍ എടക്കാട്, ഡി എര്‍ത്ത് പ്രതിനിധി സബീല്‍ തലശ്ശേരി, ഡോ. മുനവര്‍ എന്നിവരും അറക്കല്‍ രാജ കുടുംബത്തെക്കുറിച്ചും കണ്ണൂരിന്റെ പൈതൃകത്തെക്കുറിച്ചും ഗവേഷണ പഠനങ്ങളില്‍ ഏര്‍പ്പെട്ട വിവിധ സര്‍വകലാശാലാ വിദ്യാര്‍ഥികളും ചരിത്ര ഗവേഷകരും സ്ഥാനാരോഹണ ചടങ്ങില്‍ പങ്കെടുത്തു.