തിരുവനന്തപുരം: സംസ്ഥാന സര്‍ക്കാര്‍ പ്രഖ്യാപിച്ച സാലറി കട്ടിനെതിരെ പഞ്ചായത്ത് ജീവനക്കാരും രംഗത്തെത്തി. സര്‍ക്കാറിന്റെ ധനസ്ഥിതിയെ നേരിട്ട് ബാധിക്കുന്നില്ലാത്തതിനാല്‍ ശമ്പളം പിടിക്കരുതെന്ന് കേരള പഞ്ചായത്ത് എംപ്ലോയീസ് ഫെഡറേഷന്‍ ആവശ്യപ്പെട്ടു.

ഗ്രാമപഞ്ചായത്ത് ഓഫിസുകളിലെ ജീവനക്കാരുടെ ശമ്പളം നല്‍കുന്നത് ഗ്രാമപഞ്ചായത്തിലെ തനത് ഫണ്ടില്‍ നിന്നാണ്. 1997 ലെ കേരള പഞ്ചായത്ത് രാജ് ഉദ്യോഗസ്ഥരുടെ മേല്‍ നിയന്ത്രണം ചട്ടങ്ങളിലെ ചട്ടം 3(2)(1) അനുസരിച്ചാണ് ശമ്പള വിതരണം നടക്കുന്നത്. 

പ്രാദേശിക സര്‍ക്കാറിന്റെ അധികാര പരിധിയില്‍ വരുന്ന വിഷയമായതിനാല്‍ തനത്ഫണ്ടില്‍ നിന്നു നല്‍കുന്ന ശമ്പളത്തുകയില്‍നിന്ന് ഒരു ഭാഗം മാറ്റപ്പെടുന്നത് ചട്ടവിധേയമല്ലെന്നും ഫെഡറേഷന്‍ ജനറല്‍ സെക്രട്ടറി എസ്.എന്‍ പ്രമോദ് മുഖ്യമന്ത്രിക്കു നല്‍കിയ നിവേദനത്തില്‍ പറയുന്നു.