കൊട്ടാരക്കര: ജയില്‍ ശിക്ഷ കഴിഞ്ഞ് ഒരു മാസം മുന്‍പ് പുറത്തിറങ്ങിയ ക്ഷേത്ര മോഷ്ടാവ് ക്ഷേത്രങ്ങളിലെ വഞ്ചി മോഷണ കേസില്‍ വീണ്ടും പൊലിസ് പിടിയിലായി.
പനവേലി ഇരണൂര്‍ ഉമാ നിലയത്തില്‍ മോഹന്‍ദാസ് എന്നു വിളിക്കുന്ന രമണന്‍ (50) ആണ് പിടിയിലായത്. കഴിഞ്ഞ ഞായറാഴ്ച രാത്രിയില്‍ പനവേലി ശ്രീ മഹാദേവ ക്ഷേത്രത്തിലെ മൂന്നു കാണിക്കവഞ്ചികള്‍ കുത്തിത്തുറന്ന് മൂവായിരം രുപ അപഹരിച്ച കേസിലാണ് ഇയാള്‍ വീണ്ടും പിടിയിലായത്. ക്ഷേത്രത്തിലെ സി.സി.ടി.വി കാമറയില്‍ ഇയാളുടെ ദൃശ്യം പതിഞ്ഞിരുന്നു. ഇതിന്റെ അടിസ്ഥാനത്തില്‍ കൊട്ടാരക്കര റെയില്‍വേ സ്റ്റേഷന്‍ പരിസരത്തുനിന്നാണ് രമണനെ പിടികൂടിയത്.
സ്ഥിരമായി ക്ഷേത്രങ്ങള്‍ കേന്ദ്രീകരിച്ച് മേഷണം നടത്തിവരുന്ന രമണന്‍ നിലവില്‍ അഞ്ചു മോഷണക്കേസുകളില്‍ പ്രതിയാണ്. നെടുവത്തൂര്‍, നീലേശ്വരം ക്ഷേത്രങ്ങളിലെ വഞ്ചികള്‍ കുത്തിത്തുറന്ന് പണം അപഹരിച്ചതും ഇയാളാണെന്ന് പൊലിസ് പറഞ്ഞു.
കോടിതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. കൊട്ടാരക്കര എസ്.ഐ ശിവപ്രകാശ്, എ.എസ്.ഐ സലിം റാവുത്തര്‍, ആന്റിതെഫ്റ്റ് സ്‌ക്വാഡ് അംഗങ്ങളായ എസ്.ഐ ബിനോജ്, എ.എസ്.ഐമാരായ ഷാജഹാന്‍,  ശിവശങ്കരപിള്ള, സി.പി.ഒ രാധാകൃഷ്ണന്‍ എന്നിവരടങ്ങിയ സംഘമാണ് പിടികൂടിയത്.