ന്യൂഡല്‍ഹി: ലഡാക്കിലെ അതിര്‍ത്തിയില്‍ ചൈന മൂന്നു വര്‍ഷം മുന്‍പുതന്നെ സൈനിക, ആയുധ വിന്യാസങ്ങള്‍ വര്‍ധിപ്പിച്ചിരുന്നെന്നു റിപ്പോര്‍ട്ട്. നിയന്ത്രണരേഖയ്ക്കടുത്ത് ഈ മൂന്നു വര്‍ഷത്തിനിടെ 13 മിലിട്ടറി ക്യാംപുകള്‍, എയര്‍ ഡിഫന്‍സ് യൂനിറ്റ്, വ്യോമതാവളം എന്നിവ യാഥാര്‍ഥ്യമാക്കിയെന്നും കൂടുതല്‍ സൈനികരെയും ആയുധങ്ങളും ഹെലികോപ്ടറുകളും അടക്കമുള്ള കൂടുതല്‍ സൗകര്യങ്ങളും എത്തിച്ചെന്നും ദേശീയ മാധ്യമങ്ങള്‍ വ്യക്തമാക്കുന്നു.

13 മിലിട്ടറി ക്യാംപുകള്‍ക്കു പുറമേ മൂന്നു വ്യോമതാവളങ്ങള്‍, അഞ്ചിലേറെ ഹെലികോപ്ടറുകള്‍ തുടങ്ങിയവയും സജ്ജമാക്കിയിട്ടുണ്ടെന്നു റിപ്പോര്‍ട്ടുകളില്‍ വ്യക്തമാക്കുന്നു. മൂന്നു വര്‍ഷത്തിനിടെ അതിര്‍ത്തിയിലെ സൈനികബലം ചൈന ഇരട്ടിയിലേറെ വര്‍ധിപ്പിച്ചിട്ടുണ്ട്. മെയ് മാസത്തില്‍ ഇന്ത്യന്‍ സൈനികരുമായുണ്ടായ ഏറ്റുമുട്ടലിനു ശേഷം ദ്രുതഗതിയില്‍ ആയുധവിന്യാസം നടത്തിയെന്നും സൗകര്യങ്ങള്‍ വര്‍ധിപ്പിച്ചെന്നും സൂചനയുണ്ട്.

അതേസമയം, വര്‍ഷങ്ങളായി ഇന്ത്യന്‍ പ്രതിരോധ രഹസ്യങ്ങള്‍ ചൈനയ്ക്കു ചോര്‍ത്തിക്കൊടുത്ത മാധ്യമപ്രവര്‍ത്തകനും സംഘ്പരിവാറിന്റെ അടുപ്പക്കാരനുമായ രാജീവ് ശര്‍മയെ കഴിഞ്ഞ ദിവസം ഡല്‍ഹി പൊലിസിന്റെ പ്രത്യേക സംഘം അറസ്റ്റ് ചെയ്തിരുന്നു. 

ഇയാളോടൊപ്പം ഒരു ചൈനീസ് യുവതിയെയും ഇവരുടെ സഹായിയായ നേപ്പാളുകാരനെയും പിടികൂടിയിരുന്നു.