ന്യൂഡല്‍ഹി: മുന്‍ പ്രധാനമന്ത്രി രാജീവ് ഗാന്ധി യുദ്ധക്കപ്പല്‍ കുടുംബാവശ്യത്തിന് ഉപയോഗിച്ചുവെന്ന ആരോപണമുന്നയിച്ച പ്രധാനമന്ത്രി നരേന്ദ്രമോദിക്ക് നടന്‍ അക്ഷയ്കുമാറിനെ ചൂണ്ടിക്കാട്ടി കോണ്‍ഗ്രസ് നേതാവ് ദിവ്യ സ്പന്ദനയുടെ വിമര്‍ശനം.
ഐ.എന്‍.എസ് സുമിത്രയിലുള്ള അക്ഷയ്കുമാറിന്റെ ചിത്രങ്ങള്‍ ട്വീറ്റ് ചെയ്താണ് ദിവ്യ സ്പന്ദന മോദിക്കെതിരേ രംഗത്തെത്തിയിരിക്കുന്നത്. ഒരു കനേഡിയന്‍ പൗരന്‍ നാവികസേനയുടെ യുദ്ധക്കപ്പലിനുള്ളില്‍ കയറുന്നത് ഉചിതമാണോ എന്നാണ് അവരുടെ ചോദ്യം.
പ്രധാനമന്ത്രിയേയും അക്ഷയ്കുമാറിനേയും ടാഗ് ചെയ്താണ് ദിവ്യയുടെ ട്വീറ്റ്. നമ്മളില്‍ പലരും ഈ വിവാദം മറന്നിട്ടില്ലെന്നും അവര്‍ ട്വീറ്റില്‍ വ്യക്തമാക്കി.
മോദിയുമായും ബി.ജെ.പിയുമായും അടുപ്പം കാണിച്ചിട്ടുള്ള അക്ഷയ്കുമാര്‍ നേരത്തെ തെരഞ്ഞെടുപ്പില്‍ വോട്ട് ചെയ്യാതിരുന്നതും വാര്‍ത്തയായിരുന്നു. കഴിഞ്ഞ മാസം അദ്ദേഹം മോദിയുമായി അഭിമുഖം നടത്തുകയും ചെയ്തിരുന്നു.
ഡല്‍ഹിയില്‍ ബുധനാഴ്ച നടത്തിയ തെരഞ്ഞെടുപ്പ് റാലിക്കിടെയാണ് മോദി മുന്‍ പ്രധാനമന്ത്രി രാജീവ് ഗാന്ധിക്കെതിരേ ആരോപണമുന്നയിച്ചത്. നാവികസേനയുടെ വിമാനവാഹിനിക്കപ്പല്‍ ഐ.എന്‍.എസ്. വിരാട് രാജീവ് ഗാന്ധി സ്വകാര്യ ആവശ്യത്തിന് ഉപയോഗിച്ചുവെന്നായിരുന്നു ആരോപണം.
എന്നാല്‍ നരേന്ദ്രമോദിയുടെ ആരോപണം വാസ്തവ വിരുദ്ധമെന്ന് മുന്‍ നാവികസേനാ ചീഫ് അഡ്മിറല്‍ എല്‍. രാമദാസ്, ലക്ഷദ്വീപ് മുന്‍ അഡ്മിനിസ്‌ട്രേറ്റര്‍ വജാഹത്ത് ഹബീബുള്ള, റിട്ട. വൈസ് അഡ്മിറല്‍ വിനോദ് പസ്‌റിച്ച എന്നിവര്‍ വ്യക്തമാക്കിയിരുന്നു.