തിരുവനന്തപുരം: ആള്‍ക്കൂട്ടസമരങ്ങള്‍ കൊവിഡ് പ്രതിരോധം അട്ടിമറിക്കുന്നുവെന്ന് മുഖ്യമന്ത്രി പിണറായി വിജയന്‍. കൊറോണ വൈറസിന് എളുപ്പം പടരാന്‍ സമരങ്ങള്‍ അവസരമൊരുക്കുന്നു. സമരം തടയാനിറങ്ങിയ 101 പൊലിസുകാര്‍ക്ക് ഇതുവരെ കൊവിഡ് ബാധിച്ചു. 171 പൊലിസുകാര്‍ നിരീക്ഷണത്തിലാണ്. രാഷ്ട്രീയപാര്‍ട്ടികള്‍ ഉത്തരവാദിത്തത്തോടെ പെരുമാറണം. കൊവിഡ് പ്രതിരോധത്തിന് ആക്ഷീണം പ്രയത്‌നിക്കുന്നവരാണ് പൊലിസുകാര്‍. അവര്‍ക്ക് പ്രത്യുപകാരമായി രോഗം നല്‍കണോയെന്ന് എല്ലാവരും ചിന്തിക്കണം. പൊലിസുകാര്‍ ക്വറന്റൈനിലാകുന്നത് കൊവിഡിനെതിരേ പ്രവര്‍ത്തിക്കേണ്ട സര്‍ക്കാരിന് തടസം സൃഷ്ടിക്കും. ലോകാരോഗ്യ സംഘടനയടക്കം കൊവിഡ് പ്രതിരോധത്തിന്റെ ഏറ്റവും വലിയ മാര്‍ഗമായി പറഞ്ഞത് സാമൂഹ്യഅകലമാണ്. അതെല്ലാം കാറ്റില്‍പ്പറത്തിയാണ് ഇപ്പോള്‍ സമരങ്ങള്‍ അരങ്ങേറുന്നത്. വൈറസിനൊപ്പം ജീവിക്കുകയെന്ന രീതിയില്‍ വിദ്യാഭ്യാസവും വിവാഹങ്ങളും പൊതുചടങ്ങുകളും അടക്കം മാറുമ്പോഴാണ് ഈ ആള്‍ക്കൂട്ട സമരങ്ങള്‍ നടക്കുന്നത്. വലിയ മാധ്യമശ്രദ്ധ ലഭിക്കുമെന്നതാണ് ഇത്തരം സമരം നടത്താന്‍ പ്രചോദനമാകുന്നത്. ഇതിനെക്കുറിച്ച് മാധ്യമങ്ങളും ഗൗരവമായി ചിന്തിക്കണമെന്ന് മുഖ്യമന്ത്രി പറഞ്ഞു.