ലഖ്‌നൗ: സമാജ് വാദി പാര്‍ട്ടിക്ക് ബദലായി ശിവ്പാല്‍ യാദവ് രൂപീകരിച്ച അഖിലേന്ത്യാ സെക്യുലര്‍ ഫ്രണ്ട് രൂപീകരണം തന്റെ അറിവോടെയല്ലെന്ന് മുലായം സിങ് യാദവ്. പുതിയ പാര്‍ട്ടി രൂപീകരിക്കുന്നതുമായി ബന്ധപ്പെട്ട് തന്നോട് ഇതുവരെ ശിവ്പാല്‍ യാദവ് സംസാരിച്ചിട്ടില്ലെന്നുപറഞ്ഞ മുലായം, ആര് ഏത് പാര്‍ട്ടി രൂപീകരിച്ചാലും സമാജ് വാദി പാര്‍ട്ടി നിലനില്‍ക്കുമെന്ന് വ്യക്തമാക്കുകയും ചെയ്തു.
ശിവ്പാല്‍ യാദവ് തന്റെ സഹോദരനാണെന്നും അദ്ദേഹം പുതിയൊരു രാഷ്ട്രീയ പാര്‍ട്ടി രൂപീകരിക്കാനുണ്ടായ സാഹചര്യത്തെക്കുറിച്ച് ഉടന്‍ ചര്‍ച്ച ചെയ്യുമെന്നും മുലായം അറിയിച്ചു. മുലായത്തിന്റെ അറിവോടെയും അദ്ദേഹത്തെ അഖിലേന്ത്യാ പ്രസിഡന്റാക്കിയുമാണ് അഖിലേന്ത്യാ സെക്യുലര്‍ ഫ്രണ്ട് രൂപീകരിച്ചിരിക്കുന്നതെന്നാണ് ശിവ്പാല്‍ യാദവ് പറഞ്ഞിരുന്നത്. ഇക്കാര്യത്തില്‍ തനിക്ക് അറിവില്ല. അദ്ദേഹം ലഖ്‌നൗവില്‍ എത്തിയ ശേഷം ഇതുസംബന്ധിച്ച് സംസാരിക്കുമെന്നാണ് ഒരു ദേശീയ ദിനപത്രത്തിന് നല്‍കിയ അഭിമുഖത്തില്‍ മുലായം വ്യക്തമാക്കിയത്.