ലൂധിയാന: ഇന്ത്യന്‍ വനിതാ ലീഗില്‍ ഗോകുലം കേരള എഫ്.സി ഗ്രൂപ്പ് ജേതാക്കളായി സെമിയില്‍ പ്രവേശിച്ചു. ഇന്നലെ നടന്ന അവസാന ഗ്രൂപ്പ് മത്സരത്തില്‍ ഹാന്‍സ് വുമണ്‍സിനെ പരാജയപ്പെടുത്തിയതോടെയാണ് ഗോകുലം ഗ്രൂപ്പ് ചാംപ്യന്‍മാരായത്. ഹാന്‍സിനെ ഒന്നിനെതിരേ മൂന്നു ഗോളുകള്‍ക്കാണ് ഗോകുലം പരാജയപ്പെടുത്തിയത്.

ഹാന്‍സ് തുടക്കത്തില്‍ കടുത്ത വെല്ലുവിളി ഉയര്‍ത്തിയെങ്കിലും ഗോകുലത്തിന്റെ താരനിര ഉണര്‍ന്ന് കളിച്ച് ജയം കൈപ്പിടിയിലൊതുക്കുകയായിരുന്നു.

12-ാം മിനുട്ടില്‍ അഞ്ജു തമാങിന്റെ ഗോളില്‍ മുന്നില്‍ എത്തിയ ഗോകുലത്തെ 23-ാം മിനുട്ടില്‍ ഗോള്‍ തിരിച്ചടിച്ച് സമനിലയില്‍ പിടിക്കാന്‍ ഹാന്‍സിനായി. 35 ാം മിനുട്ടില്‍ രഞ്ജനയുടെ ഗോളില്‍ ഗോകുലം വീണ്ടും മുന്നിലെത്തി. ര@ണ്ടാം പകുതിയില്‍ ക്യാപ്റ്റന്‍ ദാലിമ ചിബറിലൂടെ ഗോകുലം മൂന്നാം ഗോളും നേടി ജയം ഉറപ്പിച്ചു.
ഇതോടെ അഞ്ച് മത്സരങ്ങളില്‍ നിന്ന് 15 പോയിന്റുമായി ഗ്രൂപ്പില്‍ ഒന്നാമതെത്തി. സെമിയില്‍ ഗോകുലം മണിപ്പൂര്‍ പൊലിസിനെ നേരിടും.