ലഖ്‌നോ: ഹത്രാസ് സംഭവത്തിലെ രാഹുല്‍ഗാന്ധിയുടെ ഇടപെടലിനെ വിമര്‍ശിച്ച് കേന്ദ്രമന്ത്രി സ്മൃതി ഇറാനി. ഹത്രാസിലേക്കുള്ള രാഹുലിന്റെ യാത്ര വെറും രാഷ്ട്രീയം മാത്രമാണെന്നായിരുന്നു സ്മൃതിയുടെ പ്രസ്താവന.

കോണ്‍ഗ്രസിന്റെ തന്ത്രങ്ങളെക്കുറിച്ച് ജനങ്ങള്‍ക്ക് അറിയാമെന്നും അതുകൊണ്ടാണ് 2019 ലെ തിരഞ്ഞെടുപ്പില്‍ ബി.ജെ.പിയ്ക്ക് ചരിത്രപരമായ വിജയം കൈവരിക്കാനായതെന്നും അവര്‍ മാധ്യമപ്രവര്‍ത്തകരോട് പറഞ്ഞു.

ജനാധിപത്യ രാജ്യത്ത് ഒരു നേതാവിന്റെ യാത്രാസ്വാതന്ത്ര്യം വിലക്കാനാവില്ല. എന്നാല്‍, രാഹുലിന്റെ യാത്ര രാഷ്ട്രീയ ലക്ഷ്യത്തോടെ മാത്രമാണ്. പെണ്‍കുട്ടിയ്ക്ക് നീതി ലഭിക്കുന്നതിന് വേണ്ടിയല്ലെന്നും സ്മൃതി പറഞ്ഞു.

ഈ പ്രസ്താവനയില്‍ പ്രതിഷേധിച്ച് ചില കോണ്‍ഗ്രസ്സ് പ്രവര്‍ത്തകര്‍ സ്മൃതി ഇറാനിയുടെ കാര്‍ തടഞ്ഞു. യു.പിയിലെ വാരണാസിയില്‍വെച്ചാണ് സ്മൃതിയുടെ കാര്‍ തടഞ്ഞത്.

അതേസമയം, ഹത്രാസ് വിഷയത്തില്‍ പ്രതികരണം നടത്താനോ നടപടിയെ അപലപിക്കാനോ പോലും തയ്യാറാകാത്ത സ്മൃതി ഇറാനിയുടെ നടപടി വലിയ രീതിയില്‍ വിമര്‍ശിക്കപ്പെട്ടിരുന്നു.