അഹമ്മദാബാദ്: പബ്ജി ഗെയ്മിലെ പങ്കാളിക്കൊപ്പം ജീവിക്കണമെന്ന് ആവശ്യപ്പെട്ട് വിവാഹ മോചനം തേടി ഗുജറാത്തില്‍ 19 കാരിയായ മാതാവ് വനിതാ ഹെല്‍പ് ലൈനിനെ സമീപിച്ചു.
ഗുജറാത്തിലെ വനിതാ ഹെല്‍പ് ലൈനായ 'അഭയം 181' ല്‍ ആണ് യുവതി ആവശ്യം ഉന്നയിച്ചത്. ഇതിനെ തുടര്‍ന്ന് അഭയം പദ്ധതിക്ക് കീഴില്‍ നിയോഗിച്ച കൗണ്‍സിലിങ് വിഭാഗം യുവതിയുടെ വീട് സന്ദര്‍ശിച്ച് കുടുംബവുമായി സംസാരിച്ചു. ദിവസത്തില്‍ കൂടുതല്‍ സമയവും ഇവര്‍ മൊബൈലില്‍ പബ്ജി ഗെയിം കളിക്കാറുണ്ടെന്ന് സംഘം കണ്ടെത്തി. യുവതിക്ക് കൂടുതല്‍ കൗണ്‍സിലിങ്ങുകള്‍ നല്‍കാനായി പുനരധിവാസ കേന്ദ്രത്തിലേക്ക് മാറാന്‍ ആവശ്യപ്പെട്ടെങ്കിലും നിരസിച്ചു.
അവിടെ മൊബൈല്‍ ഫോണ്‍ ഉപയോഗിക്കാന്‍ അനുവദിക്കില്ലെന്ന കാരണം പറഞ്ഞാണ് ഈ ആവശ്യം നിരസിച്ചത്. തീരുമാനം എടുക്കാന്‍ കൂടുതല്‍ സമയം വേണമെന്നും ആവശ്യം ഉണ്ടെങ്കില്‍ ഹെല്‍പ് ലൈനിലേക്ക് തിരിച്ചുവിളിക്കുമെന്ന് അവര്‍ പറഞ്ഞതായി അഭയം 181 പ്രൊജക്ട് തലവന്‍ നരേന്ദ്ര സിന്‍ഹ് ഗോഷില്‍ പറഞ്ഞു.