ലഖ്നൗ: ഹാത്രസില്‍ കൂട്ട ബലാത്സംഗത്തിനിരയായി കൊല്ലപ്പെട്ട പെണ്‍കുട്ടിയുടെ മൃതദേഹം തന്നെയാണോ പൊലിസ് സംസ്‌കരിച്ചതെന്ന് അറിയില്ലെന്ന് പെണ്‍കുട്ടിയുടെ കുടുംബം. അതുകൊണ്ട് തന്നെ പെണ്‍കുട്ടിയുടെ ചിതാഭസ്മം നിമഞ്ജനം ചെയ്യില്ലെന്നും അവര്‍ വ്യക്തമാക്കി.

'പൊലിസ് കത്തിച്ചത് ഞങ്ങളുടെ കുട്ടിയുടെ ശരീരമാണെന്നുറപ്പില്ല. ആരുടെ മൃതദേഹമാണ് കത്തിച്ചതെന്ന് പൊലിസ് വ്യക്തമാക്കണം. ഞങ്ങളെ അവളുടെ മൃതദേഹം കാണിച്ചിട്ടില്ല. പിന്നെ കത്തിച്ചത് അവളെയാണെന്ന് ഞങ്ങളെങ്ങിനെ വിശ്വസിക്കും'- കുട്ടിയുടെ സഹോദരന്റെ ഭാര്യ ചോദിക്കുന്നു. ന്യൂസ് 18ന്റേതാണ് റിപ്പോര്‍ട്ട്.

താന്‍ കേണപേക്ഷിച്ചിട്ടും പൊലിസ് കുഞ്ഞിന്റെ ശരീരം തന്നെ കാണിച്ചില്ലെന്ന് കുട്ടിയുടെ മാതാവ് ആവര്‍ത്തിക്കുന്നു. പെണ്‍കുട്ടിയുടെ മൃതദേഹം കാണാന്‍ പൊലിസ് അനുവദിച്ചില്ലെന്ന് കുടുംബം നേരത്തെ പരാതിപ്പെട്ടിരുന്നു. പെണ്‍കുട്ടിയുടെ മൃതദേഹം യുപി പൊലിസ് നിര്‍ബന്ധിച്ച് സംസ്‌കരിച്ചത് നേരത്തെ വിവാദമായിരുന്നു. അതിന് പിന്നാലെയാണ് ആരോപണവുമായി കുടുംബം രംഗത്തെത്തിയിരിക്കുന്നത്.

സെപ്തംബര്‍ 14നാണ് നാല് സവര്‍ണര്‍ ചേര്‍ന്ന് പെണ്‍കുട്ടിയെ അതിക്രൂരമായി ബലാത്സംഗം ചെയ്തത്. കുട്ടിയുടെ ഇടുപ്പെല്ല് കര്‍ക്കുകയും നാവ് മുറിക്കുകയും ചെയ്തിരുന്നു അക്രമികതള്‍ രണ്ടാഴ്ച ഗുരുതരാവസ്ഥയില്‍ കിടന്ന ശേഷം അവള്‍ മരണത്തിന് കീഴടങ്ങി. സെപ്തംബര്‍ 30 പുലര്‍ച്ചെ രണ്ടരയോടെയാണ് പൊലിസ് ഹാത്രാസ് പെണ്‍കുട്ടിയുടെ മൃതദേഹം സംസ്‌ക്കരിച്ചത്.