മലപ്പുറം: പ്ലസ്‌വണ്‍ പ്രവേശനത്തിന്റെ ട്രയല്‍ അലോട്ട്‌മെന്റ് ഫലം പ്രസിദ്ധീകരിച്ചു. 24ന് പ്രസിദ്ധീകരിക്കുന്ന ആദ്യ അലോട്ട്‌മെന്റിന്റെ സാധ്യതാ ലിസ്റ്റാണ് ഇന്നലെ പ്രസിദ്ധീകരിച്ചത്. www.hscap.kerala.gov.in എന്ന വെബ്‌സൈറ്റില്‍ അപേക്ഷാ നമ്പറും ജനന തിയതിയും ജില്ലയും നല്‍കി സാധ്യതാ അലോട്ട്‌മെന്റ് ഫലം പരിശോധിക്കാം.
ആദ്യ അലോട്ട്‌മെന്റ് മുതലാണ് സ്‌കൂളുകളില്‍ പ്ലസ്‌വണ്‍ പ്രവേശനം നടക്കുക. വിദ്യാര്‍ഥികള്‍ക്ക് ട്രയല്‍ അലോട്ട്‌മെന്റ് ഫലം പരിശോധിച്ച് അപേക്ഷാ വിവരങ്ങളില്‍ തെറ്റുകളുണ്ടെങ്കില്‍ തിരുത്തുന്നതിനുള്ള അവസരമാണിപ്പോള്‍.
ആവശ്യമെങ്കില്‍ നേരത്തെ നല്‍കിയ ഓപ്ഷനുകള്‍ പുനഃക്രമീകരിക്കുന്നതിനും പുതിയവ കൂട്ടിച്ചേര്‍ക്കുന്നതിനും അവസരമുണ്ട്. നാളെ വൈകിട്ട് നാല് വരെയാണ് വിദ്യാര്‍ഥികള്‍ക്ക് തെറ്റുതിരുത്താനുള്ള സമയം.
അപേക്ഷാവിവരങ്ങള്‍ കൃത്യമാണെന്ന് ഉറപ്പുവരുത്തുന്നതിനാണ് ട്രയല്‍ അലോട്ട്‌മെന്റ് പ്രസിദ്ധീകരിച്ചിരിക്കുന്നത്. നാളെ വൈകിട്ട് അഞ്ചിന് മുന്‍പ് സ്‌കൂളുകളില്‍ നിന്ന് എല്ലാ തിരുത്തലുകളും പൂര്‍ത്തിയാക്കണമെന്നാണ് നിര്‍ദേശം.
തിരുത്തലിനുള്ള അപേക്ഷകള്‍ 21ന് വൈകിട്ട് നാലിന് മുന്‍പ് ആദ്യം അപേക്ഷ സമര്‍പ്പിച്ച സ്‌കൂളുകളില്‍ നല്‍കണം. അപേക്ഷകര്‍ക്ക് ട്രയല്‍ അലോട്ട്‌മെന്റ് ഫലം പരിശോധിക്കുന്നതിനുള്ള സൗകര്യം സ്‌കൂളുകളില്‍ ഒരുക്കണമെന്ന് നിര്‍ദേശിച്ചിട്ടുണ്ട്. തെറ്റായ വിവരങ്ങള്‍ നല്‍കി ലഭിക്കുന്ന അലോട്ട്‌മെന്റ് റദ്ദാക്കുമെന്ന് ഹയര്‍സെക്കന്‍ഡറി അധികൃതര്‍ അറിയിച്ചിട്ടുണ്ട്. അപേക്ഷയില്‍ വിദ്യാര്‍ഥിയുടെയും രക്ഷിതാവിന്റെയും ഒപ്പും തിരുത്തേണ്ട വിവരങ്ങളുടെ വിശദാംശങ്ങളും ഉണ്ടായിരിക്കണം.