കൊച്ചി: യാത്രക്കാരെ മര്‍ദിച്ച കേസിലെ പ്രതികളായ കല്ലട ട്രാവല്‍സിലെ ജീവനക്കാരുടെ തിരിച്ചറിയല്‍ പരേഡ് വൈകിയത് എന്തുകൊണ്ടെന്ന് ഹൈക്കോടതി. തിരിച്ചറിയല്‍ പരേഡിന് ഒരു മാസത്തിലധികം സമയം ആവശ്യമുണ്ടോയെന്നും കോടതി ആരാഞ്ഞു. തിരിച്ചറിയല്‍ പരേഡിന് സമയം ലഭിക്കാത്തതിനാല്‍ ജാമ്യം റദ്ദാക്കണമെന്ന വാദം അംഗീകരിക്കാനാവില്ല. കൊലപാതക കേസില്‍ പോലും ജാമ്യം അനുവദിക്കുന്നില്ലേയെന്നും കോടതി ചൂണ്ടിക്കാട്ടി. ബസിലുണ്ടായ സംഭവം ക്രൂരവും അംഗീകരിക്കാനാവാത്തതുമാണെന്ന് കോടതി അഭിപ്രായപ്പെട്ടു. പ്രതികളുടെ പ്രവൃത്തി ഹീനമാണെന്നും കോടതി വ്യക്തമാക്കി.

പ്രതികള്‍ക്ക് ജാമ്യം അനുവദിച്ച സെഷന്‍സ് കോടതി ഉത്തരവിനെതിരേ സര്‍ക്കാര്‍ സമര്‍പ്പിച്ച ഹരജി പരിഗണിക്കവേയായിരുന്നു കോടതി നിലപാട് വ്യക്തമാക്കിയത്. ഹരജിയില്‍ കോടതി പ്രതികള്‍ക്ക് നോട്ടിസ് പുറപ്പെടുവിക്കാന്‍ ഉത്തരവിട്ടു. കേസിലെ ഒന്നു മുതല്‍ ഏഴുവരെ പ്രതികള്‍ക്ക് കഴിഞ്ഞ ദിവസമാണ് എറണാകുളം സെഷന്‍സ് കോടതി ഉപാധികളോടെ ജാമ്യം അനുവദിച്ചത്. അന്വേഷണം പ്രാഥമിക ഘട്ടത്തിലാണെന്നും പ്രതികളുടെ തിരിച്ചറിയല്‍ പരേഡ് പൂര്‍ത്തിയായിട്ടില്ലെന്നും തൊണ്ടിമുതലുകള്‍ കണ്ടെടുക്കാനുണ്ടെന്നും പ്രതികളുടെ കസ്റ്റഡി ആവശ്യമാണെന്നും സര്‍ക്കാര്‍ വിശദീകരിച്ചു. ജസ്റ്റിസ് വി. രാജാവിജയരാഘവനാണ് ഹരജി പരിഗണിച്ചത്.