മുക്കം: മുഖ്യമന്ത്രിയുടെ ദുരിതാശ്വാസ നിധിയിലേക്ക് പണം സ്വരൂപിക്കുന്നതിനായി വ്യത്യസ്ത പരിപാടിയുമായി അധ്യാപക സംഘടനയായ കെ.എസ്.ടി.എ സാന്ത്വനം വര എന്ന പേരില്‍ ഒരു ദിവസം മുഴുവന്‍ പൊതുജനങ്ങള്‍ക്ക് അവരുടെ ചിത്രങ്ങള്‍ തല്‍സമയം വരച്ചു നല്‍കിയാണ് കെ.എസ്.ടി.എ ധനസമാഹരണം നടത്തിയത്.
നവകേരള സൃഷ്ടിക്ക് ഒരു കൈത്താങ്ങായാണ് ഇത്തരമൊരു പരിപാടി സംഘടിപ്പിച്ചതെന്ന് ഭാരവാഹികള്‍ പറഞ്ഞു. ചിത്രം വരച്ചു നല്‍കുമ്പോള്‍ പൊതുജനങ്ങള്‍ നല്‍കുന്ന പണം സ്വരൂപിച്ച് മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കും. ദുരിതാശ്വാസ പ്രവര്‍ത്തനങ്ങളുടെ ഭാഗമായി മുഴുവന്‍ അംഗങ്ങളും തങ്ങളുടെ ഒരു മാസത്തെ ശമ്പളം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയിരുന്നു.
പഠനോപകരണങ്ങള്‍ നഷ്ടപ്പെട്ടവര്‍ക്ക് പഠനോപകരണങ്ങള്‍ നല്‍കല്‍, പ്രളയബാധിത പ്രദേശങ്ങളിലെ സ്‌കൂള്‍ ക്ലീനിങ്, കൗണ്‍സലിങ്, വസ്ത്രവിതരണം തുടങ്ങിയവയും സംഘടന നടത്തിയിരുന്നു. മുക്കം ബസ് സന്റാന്‍ഡ് പരിസരത്ത് നടന്ന ചടങ്ങ് ജോര്‍ജ് എം. തോമസ് എം.എല്‍.എ ഉദ്ഘാടനം ചെയ്തു.
എം.എല്‍.എയുടെ ചിത്രം വരച്ചാണ് പരിപാടിക്ക് തുടക്കമിട്ടത്. വിദ്യാര്‍ഥികളും മുതിര്‍ന്നവരും ഉള്‍പ്പെടെയുള്ള നിരവധിപേരുടെ ചിത്രങ്ങളാണ് ഇത്തരത്തില്‍ വരച്ചു നല്‍കിയത്. ചിത്രകലാ അധ്യാപകരായ സിഗ്‌നി ദേവരാജ്, ബിനീഷ് പള്ളിപ്പുറത്ത്, നൗഷാദ് വെള്ളലശ്ശേരി എന്നിവര്‍ നേതൃത്വം നല്‍കി. കൗണ്‍സിലര്‍ മുക്കം വിജയന്‍, സി.പി.എം ഏരിയാ സെക്രട്ടറി ടി. വിശ്വനാഥന്‍, പി. ഗിരീഷ്‌കുമാര്‍, എം.പി മജീദ്, എന്‍. രവീന്ദ്രകുമാര്‍, ടി.ടി ഷാജു എന്നിവര്‍ സംസാരിച്ചു.