ശ്രീനഗര്‍: ജമ്മുകശ്മിരില്‍ സുരക്ഷാ സേനയുമായുണ്ടായ ഏറ്റുമുട്ടലില്‍ രണ്ട് തീവ്രവാദികളെ വധിച്ചു. കുല്‍ഗാമിലെ ഗോപാല്‍പോറിയിലാണ് ഏറ്റുമുട്ടലുണ്ടായത്.
തീവ്രവാദ സാന്നിധ്യം സംബന്ധിച്ച് രഹസ്യവിവരം ലഭിച്ചതിനെ തുടര്‍ന്ന് നടത്തിയ തിരച്ചിലിനിടെയാണ് ഏറ്റുമുട്ടലുണ്ടായത്. തീവ്രവാദികള്‍ വെടിവച്ചതിനെ തുടര്‍ന്ന് സൈന്യം തിരിച്ചടിക്കുകയായിരുന്നു. കൊല്ലപ്പെട്ടവരെ തിരിച്ചറിഞ്ഞിട്ടില്ലെന്ന് പൊലിസ് വക്താവ് പറഞ്ഞു. പ്രദേശത്ത് നിന്ന് ആയുധങ്ങളും സ്‌ഫോടക വസ്തുക്കളും കണ്ടെത്തി.
അതിനിടെ നിയന്ത്രണാതിര്‍ത്തിയിലുണ്ടായ സ്‌ഫോടനത്തില്‍ എട്ട് ജവാന്മാര്‍ക്ക് പരുക്കേറ്റു. പൂഞ്ച് ജില്ലയില്‍ പെട്രോള്‍ നടത്തുന്നതിനിടെയാണ് സംഭവം. പരുക്കേറ്റ ജവാന്മാരെ ഉദ്ധംപൂരിലെ കമാന്‍ഡ് ആശുപത്രിയിലേക്ക് മാറ്റിയെന്നും ഒരാളുടെ നില ഗുരുതരമാണെന്നും അധികൃതര്‍ അറിയിച്ചു.