മലപ്പുറം: നഗരസഭയിലെ പ്രളയം ബാധിച്ച വിവിധ വാര്‍ഡുകളില്‍ മലപ്പുറം ഗവ. കോളജിലെ എന്‍.എസ്.എസ് വളണ്ടിയര്‍മാര്‍ ആരോഗ്യ ബോധവല്‍ക്കരണവും റസിഡന്‍ഷ്യല്‍ ക്ലോറിന്‍ ടെസ്റ്റും നടത്തി. കിണറുകളില്‍ ക്ലോറിനേഷന്‍, ഉറവിട കൊതുക് നശീകരണം, ആരോഗ്യ ശുചിത്വ ബോധവല്‍ക്കരണം, പ്രതിരോധ ഗുളികകളുടെ വിതരണം എന്നിവ നടത്തി.
പട്ടര്‍ക്കടവ്, മൈലപ്പുറം, ചെമ്മങ്കടവ്, പാണക്കാട്, താമരക്കുഴി, കണ്ണത്തുംപാറ തുടങ്ങിയ പ്രദേശങ്ങളിലെ 500 വീടുകളില്‍ നടന്ന ബോധവല്‍ക്കരണ പരിപാടിക്ക് പ്രോഗ്രാം ഓഫിസര്‍മാരായ മൊയ്തീന്‍ കുട്ടി കല്ലറ, ആമിന പൂവഞ്ചേരി, നഗരസഭ ജെ.എച്ച്.ഐ റിയാസ്, വളണ്ടിയര്‍ സെക്രട്ടറിമാരായ ആസിഫലി, അംന, ശുഫൈന, ഫാത്തിമ തഹാനി എന്നിവര്‍ നേതൃത്വം നല്‍കി.