റിയാദ്: ഇന്ത്യയടക്കം വിവിധ ഏഷ്യന്‍ രാജ്യങ്ങളിലേക്കുള്ള എണ്ണ കയറ്റുമതി വെട്ടിക്കുറയ്ക്കാന്‍ സഊദി അരാംകോ തീരുമാനിച്ചു. അടുത്ത മാസം മുതല്‍ ഏഷ്യയിലെ വിവിധ രാജ്യങ്ങളിലേക്കുള്ള എണ്ണ കയറ്റുമതിയില്‍ ഏഴു മില്യണ്‍ ബാരലിന്റെ കുറവ് വരുത്താനാണ് ഏറ്റവും വലിയ എണ്ണ കയറ്റുമതി കമ്പനിയായ സഊദി അരാംകോയുടെ തീരുമാനം.

ഇന്ത്യയിലേക്കുള്ള കയറ്റുമതിയില്‍ ഏകദേശം മൂന്നുമില്ല്യന്‍ ബാരല്‍ വെട്ടികുറയ്ക്കുമെന്നാണ് കണക്കുകള്‍. ഇതോടെ ഇന്ത്യയില്‍ എണ്ണ വില വര്‍ധിക്കാന്‍ ഇടവരുമെന്നു വിലയിരുത്തപ്പെടുന്നുണ്ട്.

കഴിഞ്ഞ ഫെബ്രുവരിയില്‍ ഇന്ത്യയിലെ റിലയന്‍സ് ഇന്‍ഡസ്ട്രീസ്, ഹിന്ദുസ്ഥാന്‍ മിത്തല്‍ എനര്‍ജി ലിമിറ്റഡ് എന്നീ കമ്പനികളുടെ റിഫൈനറികള്‍ക്ക് നല്‍കാനുള്ള എണ്ണ വിഹിതത്തിലും  സഊദി അരാംകോ കുറവ് വരുത്തിയിരുന്നു.

അന്തരാഷ്ട്ര എനര്‍ജി ഏജന്‍സിയുടെ കണക്കു പ്രകാരം ദിനേന 4.45 മില്യണ്‍ ബാരല്‍ എണ്ണയാണ് ഇന്ത്യയിലേക്ക് ഇറക്കുമതി ചെയ്യുന്നത്. ഇതില്‍ പ്രധാനമായും സഊദി അറേബ്യയില്‍നിന്നുമാണ്.