മലപ്പുറം:പൊതുനിരത്തിൽ മാലിന്യം നിക്ഷേപിച്ചതിന് ഈ വർഷം തദ്ദേശ സ്ഥാപനങ്ങൾ 2739 കേസുകളിലായി പിഴ ചുമത്തിയത് 2.66 കോടി. ജനുവരി മുതൽ സെപ്തംബർ 15 വരേയുള്ള കാലയളവിൽ പൊതു ഇടങ്ങൾ, സ്വകാര്യ സ്ഥലങ്ങൾ, ജലാശയങ്ങൾ തുടങ്ങിയവയിൽ മാലിന്യങ്ങൾ നിക്ഷേപിച്ചതിനാണ് 2,66,95,541രൂപ പിഴ ചുമത്തിയത്.

തള്ളിയ മാലിന്യം ഇവരെ കൊണ്ട് നീക്കം ചെയ്യിപ്പിച്ചിട്ടുമുണ്ട്. കേരള പഞ്ചായത്ത് രാജ് ആക്ട്, കേരള മുനിസിപ്പാലിറ്റി ആക്ട് (ഭേദഗതി 2024)പ്രകാരവുമാണ് നടപടി. പൊതു സ്ഥലങ്ങളിൽ മാലിന്യം വലിച്ചറിയുന്ന കുറ്റകൃത്യങ്ങളിൽ ഏർപ്പെടുന്നവരെ തിരിച്ചറിയുന്നതിനും നിയമാനുസൃത നടപടികൾ സ്വീകരിക്കുന്നതിനും ഈ വർഷം മുതലാണ് കർശന നടപടി തദ്ദേശ സ്ഥാപനങ്ങൾ സ്വീകരിച്ച് വരുന്നത്.

ഇതിന്റെ ഭാഗമായി മാലിന്യങ്ങൾ നിക്ഷേപിക്കുന്നവരുടെ വിവരങ്ങൾ തെളിവ് സഹിതം നൽകുന്ന വ്യക്തികൾക്ക് തദ്ദേശ സ്ഥാപനങ്ങൾ പാരിതോഷികം നൽകുന്നുണ്ട്.   പൊതു ഇടങ്ങൾ, സ്വകാര്യ സ്ഥലങ്ങൾ, ജലാശയങ്ങൾ എന്നിവിടങ്ങളിൽ മാലിന്യം വലിച്ചെറിയുക, നിക്ഷേപിക്കുക, ദ്രവമാലിന്യം ഒഴുക്കിക്കളയുക തുടങ്ങിയവ നടത്തുന്ന സാമൂഹികവിരുദ്ധർക്കെതിരേയാണ് നിയമങ്ങൾ കർക്കശമാക്കിയത്. 

നിയമലംഘകരിൽ നിന്നും ഈടാക്കുന്ന പിഴത്തുകയുടെ 25 ശതമാനമോ, പരമാവധി 2500 രൂപ വരേ റിപ്പോർട്ട് ചെയ്യുന്ന വ്യക്തികൾക്ക് മാനദണ്ഡപ്രകാരം പാരിതോഷികം നൽകുന്നുണ്ട്. പിഴ വ്യക്തികൾ ഒടുക്കിയ തിയതി മുതൽ 30 ദിവസത്തിൽ പാരിതോഷികം ബാങ്ക് അക്കൗണ്ടിലേക്കാണ് നൽകുന്നത്.

 തദ്ദേശ സ്ഥാപനങ്ങളുടെ സെക്രട്ടറിക്കാണ് കുറ്റകൃത്യം നടത്തുന്ന ആളിനേയോ, വാഹനത്തേയോ തിരിച്ചറിയാൻ സഹായിക്കുന്ന ഫോട്ടോ, വീഡിയോ, സ്ഥലം, സമയം ഉൾപ്പടെയുള്ള തെളിവ് സഹിതം നൽകേണ്ടത്. വിവരം നൽകുന്നവരെക്കുറിച്ച് രഹസ്യമാക്കും. നിയമലംഘനം പരാതി ലഭിച്ച് ഏഴ് ദിവസത്തിനകം തദ്ദേശ സെക്രട്ടറി അന്വഷണം നടത്തി തുടർനടപടികൾ സ്വീകരിക്കുന്നുണ്ട്.