ഇരിട്ടി: ആറളം പുനരധിവാസ മേഖലയിലും ആറളം വനാതിര്‍ത്തി പ്രദേശങ്ങളിലും നിരവധി അക്രമങ്ങള്‍ നടത്തുകയും നാലു പേരുടെ ജീവനെടുക്കുകയും ചെയ്ത കുട്ടിക്കൊമ്പന്‍ കാട്ടാനയെ മയക്കുവെടിവച്ചു പിടിക്കാനുള്ള ശ്രമം ഊര്‍ജിതം. ആനയെ മയക്കുവെടിവച്ചു പിടിച്ചശേഷം ഇതിനെ പ്രത്യേകം തയാറാക്കിയ ആനക്കൂട്ടിലേക്കു മാറ്റുന്നതിനായി പരിശീലനം നല്‍കിയ കുംകിയാനകളെ ഫാമില്‍ എത്തിച്ചു.
വയനാട്ടിലെ മുത്തങ്ങയില്‍ നിന്നാണ് രണ്ടു ആനകളെ എത്തിച്ചിട്ടുള്ളത്. കര്‍ണാടകത്തില്‍ നിന്നു ഒരാനകൂടി ഇന്നോ നാളെയോ ഫാമില്‍ എത്തും. ഏതാനും മാസങ്ങള്‍ക്കുള്ളില്‍ നാലോളം പേരാണ് ഇവിടെ ആനയുടെ ആക്രമണത്തില്‍ മരിച്ചത്. കുടിലുകളും മറ്റും തകര്‍ക്കുകയും കൃഷിയിടങ്ങള്‍ നശിപ്പിക്കുന്നതും നിത്യസംഭവമായിരുന്നു. ഏറ്റവും ഒടുവിലായി കഴിഞ്ഞ ഏപ്രില്‍ അഞ്ചിന് ഫാമിലെ കൈതച്ചക്ക കൃഷിയിടത്തില്‍ ഇറങ്ങിയ കാട്ടാന തോട്ടം കാവല്‍ക്കാരനായ റെജി എബ്രഹാമിനെ ചവിട്ടിക്കൊന്നിരുന്നു.
ആനകളെ തുരത്തി കാട്ടിലേക്ക് തിരിച്ചുവിട്ടെങ്കിലും മണിക്കൂറുകള്‍ക്കകം വീണ്ടും ജനവാസ മേഖലയിലേക്ക് ഇവ തിരിച്ചു വന്നു. ഇതിന്റെ അടിസ്ഥാനത്തിലാണ് ജില്ലാ ഭരണകൂടവും വനം വകുപ്പും നടത്തിയ ചര്‍ച്ചയില്‍ ആനടെ പിടികൂടി ഉള്‍വനത്തില്‍ കൊണ്ടുവിടാന്‍ തീരുമാനിച്ചത്.
ഇതിനായി ഫാമിലെ വന്യജീവി സങ്കേതം ഓഫിസിനോട് ചേര്‍ന്ന് വയനാട്ടില്‍ നിന്നു എത്തിച്ച യൂക്കാലി മരങ്ങള്‍ കൊണ്ട് ആനയെ തളക്കാനുള്ള കൂടും ഒരുക്കിക്കഴിഞ്ഞു.
ആനയെ പിടിക്കുന്നതിനും മറ്റു കാര്യങ്ങള്‍ ആലോചിക്കുന്നതിനുമായി ഉദ്യോഗസ്ഥരുടെ യോഗം ഇന്ന് നടക്കുമെന്നു വനം വകുപ്പ് ഉദ്യോഗസ്ഥര്‍ അറിയിച്ചു.