മലപ്പുറം: സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളുമായി യു.ഡി.എഫ് കണ്‍വിനര്‍ എം.എം ഹസന്‍ കൂടിക്കാഴ്ച്ച നടത്തി. ജിഫ്‌രി  തങ്ങള്‍ പ്രിന്‍സിപ്പല്‍ ആയ കൊണ്ടോട്ടി, മുണ്ടക്കുളം ശംസുല്‍ ഉലമ ഇസ്‌ലാമിക് കോംപ്ലക്‌സില്‍ ഉച്ചയോടെ നടന്ന കൂടിക്കാഴ്ച അരമണിക്കൂറോളം നീണ്ടു.

 കൂടിക്കാഴ്ചയില്‍ രാഷ്ട്രീയ കാര്യങ്ങളൊന്നും ചര്‍ച്ചയായില്ലെന്ന് പിന്നീട് തങ്ങള്‍ പ്രതികരിച്ചു. ഇപ്പോള്‍ വഹിക്കുന്ന ചുമതലകള്‍ ഭംഗിയായി നിര്‍വഹിക്കാന്‍ ഹസന് കഴിയട്ടെയെന്നും തങ്ങള്‍ പറഞ്ഞു. കണ്‍വിനര്‍ സ്ഥാനം ഏറ്റെടുത്ത ശേഷം പ്രമുഖ വ്യക്തികളെ സന്ദര്‍ശിക്കുന്നതിന്റെ ഭാഗമായാണ് സന്ദര്‍ശനമെന്ന് എം.എം ഹസനും പ്രതികരിച്ചു. 

രാവിലെ പാണക്കാട് സയ്യിദ് ഹൈദരലി ശിഹാബ് തങ്ങള്‍, പി.കെ കുഞ്ഞാലിക്കുട്ടി ഉള്‍പ്പെടെയുള്ളവരുമായും ഹസന്‍ കൂടിക്കാഴ്ച നടത്തിയിരുന്നു. വൈകീട്ടോടെ ജമാഅത്തെ ഇസ്‌ലാമി കേരള അമീര്‍ എം.ഐ അബ്ദുല്‍ അസീസിനെയും എം.എം ഹസന്‍ കണ്ടു.