പൂച്ചാക്കല്‍ : പാണാവള്ളിയില്‍ നിന്നു കാണാതായ 15 വയസുകാരന്‍ നിസാമുദ്ദീനെ മൂന്നാറില്‍ കണ്ടെന്നു സൂചന.  
മൂന്നാറിലെ ചീരപ്പാറ എന്ന സ്ഥലത്ത് നിസാമുദീനെ കണ്ടെന്ന സൂചന  പ്രദേശവാസിയാണ് അവിടുത്തെ പൊലിസിനെയും ഇവിടെ നിന്നുള്ള പ്രത്യേക അന്വേഷണ സംഘത്തെയും അറിയിച്ചത്.റോഡരികില്‍ എവിടെയോ കണ്ടെന്നാണ് പറഞ്ഞിരിക്കുന്നത്. നിസാമുദ്ദീന്റെ വിവരവും ചിത്രവും അവിടുത്തെ മാധ്യമങ്ങളില്‍ കണ്ടതിനെ തുടര്‍ന്നാണ് പ്രദേശവാസി സൂചന നല്‍കിയത്. സൂചന സംബന്ധിച്ചും ആ സ്ഥലത്തെചുറ്റിപ്പറ്റിയും കൂടുതല്‍ അന്വേഷിക്കാന്‍ തീരുമാനിച്ചിരിക്കുകയാണ്.
അതേസമയം അന്വേഷണത്തിനായി ബുധനാഴ്ച്ച ബംഗളൂരുവിലേക്ക് പുറപ്പെട്ട ഒരു സംഘം പൊലിസ് ഇന്നലെ അവിടെയെത്തി അന്വേഷണം തുടങ്ങി.പ്രധാനസ്ഥലങ്ങള്‍,സ്ഥാപനങ്ങള്‍ തുടങ്ങിയവയില്‍ നിസാമിന്റെ ചിത്രം കാണിച്ചാണ് അന്വേഷണം നടത്തുന്നത്.
കര്‍ണാടക പൊലിസിന്റെ സഹായവും തേടിയിട്ടുണ്ട്.ബംഗളൂരുവില്‍ പോകാനും ജീവിക്കാനും നിസാമുദ്ദീന് അതിയായി ആഗ്രഹമുണ്ടായിരുന്നെന്നും മൂന്നാറില്‍പോയി ജോലിചെയ്തു പണമുണ്ടാക്കി ബൈക്ക് വാങ്ങിക്കണമെന്നും നിസാമുദ്ദീന്‍ ചിലരോട് പറഞ്ഞതായി പൊലിസിനു ലഭിച്ച വിവരത്തിന്റെ അടിസ്ഥാനത്തിലാണ് രണ്ടുസ്ഥലങ്ങളിലേക്കും അന്വേഷണ സംഘം പുറപ്പെട്ടത്.
 ചേര്‍ത്തല ഡിവൈ.എസ്.പി വൈ.ആര്‍ റസ്റ്റത്തിന്റെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്.പാണാവള്ളി തോട്ടത്തില്‍ നികര്‍ത്തില്‍ താജു -റാഹത്ത് ദമ്പതികളുടെ മകന്‍ നിസാമുദ്ദീനെ ഏപ്രില്‍ എട്ടുമുതലാണ് കാണാതായിരിക്കുന്നത്.