ന്യൂഡല്‍ഹി: കള്ളപ്പണ ഇടപാടുമായി ബന്ധപ്പെട്ട് എന്‍ഫോഴ്‌സ്‌മെന്റ് ഡയരക്ടറേറ്റ് ഇന്നലെയും റോബര്‍ട്ട് വദ്രയെ ചോദ്യം ചെയ്തു.
എന്‍ഫോഴ്‌സ്‌മെന്റ് ഡയരക്ടറേറ്റില്‍ ചോദ്യം ചെയ്യലിന് പോകുന്നതിന് മുന്‍പ് തന്നെ ഏജന്‍സി ഇതുവരെ 70 മണിക്കൂറാണ് ചോദ്യം ചെയ്തതെന്ന് വദ്ര പറഞ്ഞു. കള്ളപ്പണ ഇടപാട്, അനധികൃതമായി സ്ഥലം ഇടപാട് എന്നിവയുമായി ബന്ധപ്പെട്ടാണ് അദ്ദേഹത്തെ ചോദ്യം ചെയ്യുന്നത്. ലണ്ടന്‍, ദുബൈ, രാജസ്ഥാന്‍, ഡല്‍ഹി എന്നിവിടങ്ങളില്‍ സ്വത്തുക്കള്‍ വാങ്ങിയതുമായി ബന്ധപ്പെട്ട് വദ്രയുടെ പേരില്‍ എന്‍ഫോഴ്‌സ്‌മെന്റ് ഡയരക്ടറേറ്റ് കേസെടുക്കുകയും തുടര്‍ച്ചയായി ചോദ്യം ചെയ്തുവരികയുമാണ്. ഇന്നലെത്തെ ചോദ്യം ചെയ്യല്‍ ഉള്‍പ്പെടെ 11 തവണയാണ് താന്‍ എന്‍ഫോഴ്‌സ്‌മെന്റ് ഡയരക്ടറേറ്റിന് മുന്‍പില്‍ എത്തിയത്. 11 തവണയായി 70 ണിക്കൂറാണ് താന്‍ ചോദ്യം ചെയ്യലിന് ഹാജരായതെന്നും വദ്ര പറയുന്നു.