കോട്ടയം: കേരളാ കോണ്‍ഗ്രസ് (എം) ന്റെ ചെയര്‍മാന്‍ ഇന്‍ ചാര്‍ജ്, ആക്ടിങ് ചെയര്‍മാന്‍, ടെംബററി ചെയര്‍മാന്‍ എന്നീ മൂന്നു പദവികള്‍ ഒരേസമയം താന്‍ വഹിക്കുന്നതായി സ്വയംപ്രഖ്യാപിച്ചുകൊണ്ട് പി.ജെ ജോസഫ് ഇലക്ഷന്‍ കമ്മിഷന് നല്‍കിയ കത്ത് പാര്‍ട്ടി ഭരണഘടനയ്ക്ക് വിരുദ്ധവും സംഘടനാ ചട്ടങ്ങളുടെ ലംഘനവുമാണെന്ന് കേരളാ കോണ്‍ഗ്രസ് (എം) ഉന്നതാധികാരസമിതിയംഗവും നിയുക്ത എം.പിയുമായ തോമസ് ചാഴികാടന്‍.
ഈ മൂന്ന് പദവികളും കേരളാ കോണ്‍ഗ്രസ് (എം) ന്റെ ഭരണഘടനയില്‍ ഒരിടത്തും പരാമശിച്ചിട്ടില്ലാത്തതാണ്.
ചെയര്‍മാന്റെയും വര്‍ക്കിങ് ചെയര്‍മാന്റെയും ചുമതലകളും പ്രവര്‍ത്തനവും സംബന്ധിച്ച് പാര്‍ട്ടി ഭരണഘടന വളരെ സുവ്യക്തമായി രേഖപ്പെടുത്തിയിട്ടുണ്ട്. പാര്‍ട്ടി ചെയര്‍മാന്‍ തീരുമാനങ്ങള്‍ എടുക്കേണ്ടത് വര്‍ക്കിങ് ചെയര്‍മാനുമായി കൂടിയാലോചിച്ചുവേണമെന്നും, ഏതെങ്കിലും സാഹചര്യത്തില്‍ ചെയര്‍മാന് മറ്റ് അസൗകര്യങ്ങള്‍ മൂലം ചുമതല നിര്‍വഹിക്കാന്‍ കഴിയാതെ വന്നാല്‍ വര്‍ക്കിങ് ചെയര്‍മാന് ചെയര്‍മാനുമാനുമായി കൂടിയാലോചിച്ച് ചുമതലകള്‍ നിര്‍വഹിക്കാം എന്നാണ് ഭരണഘടനയില്‍ പറയുന്നുണ്ട്. ഇതിനെയെല്ലാം അട്ടിമറിക്കുന്നതാണ് പി.ജെ ജോസഫിന്റെ കത്ത്.
ചെയര്‍മാന്റെ മാത്രം അധികാര പരിധിയില്‍ വരുന്ന നിയമനമാണ് ഓഫിസ് ചാര്‍ജ് ജന. സെക്രട്ടറി എന്നത്. ചെയര്‍മാന്‍ മരണപ്പെട്ട സാഹചര്യത്തില്‍ നിലവിലെ ഓഫിസ് ചാര്‍ജ് ജന. സെക്രട്ടറി എന്ന പദവിയും ഇല്ലാതായിരിക്കുകയാണെന്നും തോമസ് ചാഴികാടന്‍ പറഞ്ഞു.