തൊടുപുഴ:പ്രളയവും മണ്ണിടിച്ചിലും ഉരുള്‍പൊട്ടലും മൂലം തകര്‍ന്നടിഞ്ഞ ഇടുക്കി ജില്ലയുടെ പുനര്‍ നിര്‍മ്മാണത്തിന് പ്രത്യേക പാക്കേജ് അനുവദിക്കാന്‍ സര്‍ക്കാര്‍ തയ്യാറാകണമെന്ന് മുസ്ലിം ലീഗ് ഇടുക്കി ജില്ലാ നേതൃയോഗം പ്രമേയത്തിലൂടെ ആവശ്യപ്പെട്ടു.
പ്രളയ ബാധിതര്‍ക്ക് അടിയന്തിര ദുരിതാശ്വാസമായി സര്‍ക്കാര്‍ പ്രഖ്യാപിച്ച പതിനായിരം രൂപ അര്‍ഹരായ ആര്‍ക്കും ഇതുവരെ ലഭിക്കാത്ത സ്ഥിതിയാണ് ഉള്ളത്. ജില്ലയിലെ പുനരധിവാസ പ്രവര്‍ത്തനങ്ങള്‍ സത്യസന്ധമായും പക്ഷപാത രഹിതമായും നടത്തുവാന്‍ മോണിറ്ററിംഗ് സംവിധാനം കൂടുതല്‍ കാര്യക്ഷമമാക്കണം. ഇതിനായി ജില്ലാ കലക്ടറുടെ നേതൃത്വത്തില്‍ രാഷ്ട്രീയ പാര്‍ട്ടി പ്രതിനിധികളെയും സന്നദ്ധ സംഘടനാ പ്രവര്‍ത്തകരെയും ഉള്‍പെടുത്തി ജില്ലാതല സമിതി രൂപീകരിക്കണം.
ജില്ലാ പ്രസിഡന്റ് എം.എസ് മുഹമ്മദിന്റെ അദ്ധ്യക്ഷതയില്‍ നടന്ന യോഗം സംസ്ഥാന സെക്രട്ടറി ടി.എം സലിം ഉദ്ഘാടനം ചെയ്തു. സംസ്ഥാന സെക്രട്ടറിയേറ്റ് മെമ്പര്‍ കെ.എം.എ ഷുക്കൂര്‍ സംഘടനാ റിപ്പോര്‍ട്ട് അവതരിപ്പിച്ചു. ജില്ലാ ജനറല്‍ സെക്രട്ടറി എ.എം ഹാരിദ് സ്വാഗതമാശംസിച്ചു. നിയോജകമണ്ഡലം തലയോഗങ്ങള്‍ സംഘടിപ്പിക്കാനും തീരുമാനിച്ചു.
ചര്‍ച്ചയില്‍ പങ്കെടുത്ത് ജില്ലാ വൈസ് പ്രസിഡന്റുമാരായ പി.എസ് അബ്ദുല്‍ ജബ്ബാര്‍,എം.എം ബഷീര്‍,കെ.എം ഖാദര്‍ കുഞ്ഞ്,എസ്.എം ഷരീഫ്, പി.എം അബ്ബാസ്, കെ.എം മുഹമ്മദ് മൗലവി,സെക്രട്ടറിമാരായ ടി.എസ് ശംസുദ്ദീന്‍, അഡ്വ ഇ.എസ് മൂസ, നിയോജകമണ്ഡലം ഭാരവാഹികളായ പി.എന്‍ സീതി (തൊടുപുഴ) കെ.എ സിയാമോന്‍( ദേവി കുളം), പി.എസ് യൂനസ്(ഉടുമ്പന്‍ചോല) ടി.എച്ച് അബ്ദുല്‍ സമദ്,ഏന്തയാര്‍ കുഞ്ഞ് മോന്‍( പീരുമേട്), എം.കെ നവാസ്(ഇടുക്കി), പോഷകാ സംഘടനാ ഭാരവാഹികളായ ടി.കെ നവാസ്, സി.എം അന്‍സാര്‍(യൂത്ത് ലീഗ്), കെ.എം അന്‍വര്‍(എം.എസ്.എഫ്), പി.എം.എ റഹിം(എസ്.ടി.യു), മുഹമ്മദ് ഇരുമ്പുപാലം(സ്വതന്ത്ര കര്‍ഷക സംഘം) എന്നിവര്‍ സംസാരിച്ചു.