കണ്ണൂര്‍: കടാശ്വാസം ശുപാര്‍ശ ചെയ്ത കേസുകളില്‍ കടാശ്വാസ തുക അനുവദിക്കുന്നതിനുള്ള നടപടികള്‍ ത്വരിതപ്പെടുത്തണമെന്ന് സംസ്ഥാന മത്സ്യത്തൊഴിലാളി കടാശ്വാസ കമിഷന്‍. എത്രയും വേഗം തുക ബന്ധപ്പെട്ട ബാങ്കിന് നല്‍കാനും രണ്ടു കേസുകള്‍ സംബന്ധിച്ച പരാതികള്‍ പരിഗണിച്ചുകൊണ്ട് കമിഷന്‍ നിര്‍ദ്ദേശിച്ചു.
കമിഷന്‍ചെയര്‍മാന്‍ ജസ്റ്റിസ് പി.എസ് ഗോപിനാഥന്റെ അധ്യക്ഷതയില്‍ കണ്ണൂര്‍ ഗവ. ഗസ്റ്റ് ഹൗസില്‍ നടത്തിയ സിറ്റിങിലാണ് ഇക്കാര്യങ്ങള്‍ പറഞ്ഞത്. രണ്ടു കേസുകളില്‍ വീണ്ടും സഹകരണ വകുപ്പ് ഓഡിറ്റ് വിഭാഗത്തിന്റെ പുന:പരിശോധന നടത്തി റിപ്പോര്‍ട്ട് നല്‍കുന്നതിനും സഹകരണ വകുപ്പ് ജോയിന്റ് രജിസ്ട്രാര്‍ക്ക് കമ്മീഷന്‍ നിര്‍ദ്ദേശം നല്‍കി. ചെറുതാഴം സര്‍വിസ് സഹകരണ ബാങ്കില്‍ നിന്നെടുത്ത അഗസ്റ്റ്യന്റെ വായ്പ കാലഹരണപ്പെട്ട വായ്പ എന്ന നിലയില്‍ തീര്‍പ്പാക്കി നടപടി അവസാനിപ്പിക്കാന്‍ ബാങ്കിനോട് നിര്‍ദ്ദേശിച്ചിരുന്നെങ്കിലും തുക ഈടാക്കുന്നതിന് ബാങ്ക് നിര്‍ബ്ബന്ധിക്കുന്നതായി പരാതി ലഭിച്ചിരുന്നു. ഇതില്‍ നോട്ടീസ് നല്‍കിയെങ്കിലും ബാങ്ക് പ്രതിനിധി ഹാജരായില്ല. മത്സ്യത്തൊഴിലാളിയെ ബുദ്ധിമുട്ടിക്കാതെ വായ്പ തീര്‍പ്പാക്കാന്‍ ബാങ്കിനോട് നിര്‍ദ്ദേശിച്ച് കമിഷന്‍ഉത്തരവിട്ടു.