മാഡ്രിഡ്: തുടര്‍ച്ചയായി ഏഴ് മത്സരങ്ങളില്‍ സെര്‍ബിയയുടെ ലോക രണ്ടാം നമ്പര്‍ താരം നൊവാക് ക്യോക്കോവിചിന് മുന്നില്‍ അടിയറവ് പറഞ്ഞ സ്പാനിഷ് താരം റാഫേല്‍ നദാല്‍ എട്ടാം പോരാട്ടത്തില്‍ വിജയിച്ചു. മാഡ്രിഡ് മാസ്റ്റേഴ്‌സ് ടെന്നീസിന്റെ പുരുഷ വിഭാഗം സിംഗിള്‍സ് സെമിയില്‍ ദ്യോക്കോവിചിനെ വീഴ്ത്തി നദാല്‍ ഫൈനലിലേക്ക് മുന്നേറി. രണ്ട് സെറ്റ് മാത്രം നീണ്ട പോരാട്ടത്തില്‍ 6-2, 6-4 എന്ന സ്‌കോറിന് അനായാസ വിജയമാണ് സ്പാനിഷ് താരം നേടിയത്. ഇന്ന് നടക്കുന്ന ഫൈനലില്‍ ഡൊമിനിക്ക് തീം- പബ്ലോ ക്യുവാസ് സെമി പോരാട്ടത്തിലെ വിജയിയെ നദാല്‍ നേരിടും.
സീസണില്‍ മികച്ച മുന്നേറ്റം നടത്തുന്ന നദാല്‍ കളിമണ്‍ കോര്‍ട്ടില്‍ ഈ സീസണില്‍ നേടുന്ന തുടര്‍ച്ചയായ 14ാം വിജയമാണിത്. ഇന്ന് നടക്കുന്ന പോരാട്ടത്തില്‍ വിജയിച്ചാല്‍ മാഡ്രിഡിലെ നദാലിന്റെ അഞ്ചാം കിരീട നേട്ടമായി അത് മാറും.