മുംബൈ: ലോകത്ത് ഒറ്റ റണ്‍വേയുള്ള വിമാനത്തവാളങ്ങളില്‍ ഏറ്റവും തിരക്കുള്ള വിമാനത്തവാളമെന്ന ഖ്യാതി ഇനി മുംബൈക്ക്. ലണ്ടനിലെ ഗാറ്റ്വിക് വിമാനത്താവളത്തെ മറിക്കടന്നാണ് മുംബൈ ഈ ഖ്യാതി സ്വന്തമാക്കിയത്. 4.4 കോടി യാത്രക്കാരാണ് ഗാറ്റ്വിക് വിമാനത്താവളത്തിലൂടെ യാത്ര നടത്തുന്നതെങ്കില്‍ മുംബൈക്ക് ഇത് 4.52 കോടി യാത്രക്കാരാണുള്ളത്.

പ്രതിദിനം 837 ഫ്‌ളൈറ്റുകളാണ് മുംബൈയില്‍ ഇറങ്ങുന്നതും ഉയരുന്നതും. ഗാറ്റ്വിക് വിമാനത്താവളത്തിലാവട്ടെ ഇത് 757 ഫ്‌ളൈറ്റുകളാണ്. അതായത് മുംബൈയില്‍ ഓരോ 65 സെക്കന്‍ഡിനുള്ളില്‍ വിമാനങ്ങള്‍ പറന്നുയരുകയോ ഇറങ്ങുകയോ ചെയ്യുന്നു.

റെക്കോര്‍ഡ് അഭിമാനത്തിനു വക നല്കുന്നതാണെങ്കിലും ഒറ്റ റണ്‍വേയിലൂടെ മുഴുവന്‍ വിമാനങ്ങളെയും പറത്തിവിടാനും നിലത്തിറക്കാനും വിമാനത്താവളത്തിലെ എയര്‍ട്രാഫിക് കണ്‍ട്രോളര്‍മാര്‍ കഠിനപ്രയത്‌നമാണു നടത്തുന്നത്. തിരക്കേറിയ സാഹചര്യത്തില്‍ വിമാനത്താവളത്തിലെ എയര്‍ക്രാഫ്റ്റ് പാര്‍ക്കങ് മേഖല വിപുലീരിക്കാന്‍ ഒരുങ്ങുകയാണ് വിമാനത്താവളത്തിന്റെ ഉടമസ്ഥതയുള്ള മുംബൈ ഇന്റര്‍നാഷണല്‍ എയര്‍പോര്‍ട്ട് ലിമിറ്റഡ്. കൂടുതല്‍ പാര്‍ക്കിങ് മേഖല ലഭ്യമാക്കി വിമാനങ്ങളുടെ പറക്കലിന് കൂടുതല്‍ ഇടവേളയുണ്ടാക്കാനാണ് അധികൃതരുടെ ശ്രമം.