മലപ്പുറം: ഇതുവരെ പ്ലസ്‌വണ്‍ പ്രവേശനം ലഭിക്കാത്തവര്‍ക്കായി നടത്തിയ രണ്ടാം സപ്ലിമെന്ററി അലോട്ട്‌മെന്റില്‍ ജില്ലയില്‍ നിന്ന് 1760 വിദ്യാര്‍ഥികള്‍ ഇടംപിടിച്ചു. 20,000ത്തിലധികം വിദ്യാര്‍ഥികള്‍ സീറ്റ് ലഭിക്കാതെ മറ്റുവഴിതേടിയ ജില്ലയില്‍ രണ്ടാം സപ്ലിമെന്ററിക്ക് 10666 വിദ്യാര്‍ഥികളാണ് അപേക്ഷ നല്‍കിയത്. സംവരണ തത്വം അനുസരിച്ച് നിലവില്‍ ഉണ്ടായിരുന്ന ഒഴിവുകള്‍ ജില്ല അടിസ്ഥാനത്തില്‍ പരിഗണിച്ചാണ് രണ്ടാം അലോട്ട്‌മെന്റ് നടന്നത്. അലോട്ട്‌മെന്റ് ലഭിച്ച വിദ്യാര്‍ഥികള്‍ അതത് സ്‌കൂളുകളില്‍ ഇന്ന് വൈകീട്ട് നാലിനകം സ്ഥിര പ്രവേശനം നേടണം.
അലോട്ട്‌മെന്റ് ഫലത്തോടൊപ്പം ലഭിക്കുന്ന രണ്ടു പേജുള്ള അലോട്ട്‌മെന്റ് സ്ലിപ്പുമായാണ് സ്‌കൂളില്‍ എത്തേണ്ടത്. സ്‌കൂളുകളില്‍ നിന്നും ഡാറ്റ എന്‍ട്രി, വെരിഫിക്കേഷന്‍ പിഴവു മൂലം അലോട്ട്‌മെന്റ് ലഭിക്കാതിരിക്കുകയും അലോട്ട്‌മെന്റ് ലഭിച്ചിട്ടും പ്രവേശനം നിരസിക്കപ്പെട്ട അപേക്ഷകരുടെയും ഫലവും ഈ ഘട്ടത്തില്‍ പ്രസിദ്ധീകരിച്ചിട്ടുണ്ട്. ഇവരും ഇന്നു വൈകുന്നേരം നാലിനകം പ്രവേശനം നേടണം. അതേസമയം ഏകജാലക സംവിധാനത്തില്‍ മെരിറ്റ് ക്വാട്ടയിലും സ്‌പോര്‍ട്‌സ് കോട്ടയിലും ഇതുവരെ പ്രവേശനം ലഭിച്ച വിദ്യാര്‍ഥികള്‍ക്ക് കോഴ്‌സ്, സ്‌കൂള്‍ എന്നിവ മാറുന്നതിനുള്ള മാര്‍ഗ നിര്‍ദേശം 28 ന് പ്രസിദ്ധീകരിക്കും.