പാപ്പിനിശ്ശേരി: വളപട്ടണം പുഴയില്‍ അനധികൃത മണല്‍ വാരലില്‍ പിടിച്ചെടുത്ത തോണികള്‍ ഇന്നുമുതല്‍ നീക്കം ചെയ്തു തുടങ്ങും. ബോട്ട്‌ജെട്ടിക്കു സമീപം തോണികള്‍ കെട്ടിയിട്ടതു കാരണം പുഴയില്‍ സര്‍വിസ് നടത്തുന്ന ജലഗതാഗത വകുപ്പിന്റെ ബോട്ട് കരയ്ക്കടുപ്പിക്കാന്‍ സാധിക്കുന്നില്ല. മൂന്നു ദിവസമായി വളപട്ടണത്ത് സ്റ്റോപ്പില്ലാതെയാണ് ബോട്ട് സര്‍വിസ് നടത്തുന്നത്. വളപട്ടണം-പറശ്ശിനിക്കടവ്, വളപട്ടണം-മാട്ടൂല്‍ തുടങ്ങിയ സ്ഥലങ്ങളെ ബന്ധിപ്പിച്ച് ഒരു ദിവസം പത്ത് ട്രിപ്പുകളാണ് ബോട്ട് സര്‍വിസ് നടത്തുന്നത്. തടസമായ തോണികള്‍ നീക്കം ചെയ്ത് വളപട്ടണത്ത് സ്റ്റോപ്പ് അനുവദിക്കുന്നതിന് സൗകര്യം ഏര്‍പ്പെടുത്തണമെന്നാവശ്യപ്പെട്ട് ജലഗതാഗത വകുപ്പ് ഡയറക്ടര്‍ വളപട്ടണം പൊലിസില്‍ പരാതി നല്‍കിയിരുന്നു. വളപട്ടണം എസ്.ഐ ശ്രീജിത്ത് കൊടേരി, കോസ്റ്റല്‍ പൊലിസ് എന്നിവരുടെ നേതൃത്വത്തിലായിരിക്കും വളപട്ടണം ഖലാസികള്‍ തോണികള്‍ നീക്കം ചെയ്യുക.