തിരുവനന്തപുരം: രാജ്യാന്തര ക്രിക്കറ്റ് മത്സരങ്ങള്‍ നടത്താന്‍ ഗ്രീന്‍ഫീല്‍ഡ് സ്റ്റേഡിയം യോഗ്യമെന്ന് ബി.സി.സി.ഐ. ജൂലൈയില്‍ ഐ.സി.സി സംഘം സ്റ്റേഡിയം സന്ദര്‍ശിച്ച് പരിശോധന നടത്തും. അടുത്ത സീസണില്‍ തന്നെ ഗ്രീന്‍ഫീല്‍ഡില്‍ രാജ്യാന്തര മത്സരം നടത്താന്‍ കഴിഞ്ഞേക്കുമെന്നും ബി.സി.സി.ഐ ആക്ടിങ് സെക്രട്ടറി അമിതാഭ് ചൗധരി വ്യക്തമാക്കി. ഗ്രീന്‍ഫീല്‍ഡ് സ്റ്റേഡിയത്തില്‍ ഒരുക്കിയ സൗകര്യങ്ങള്‍ അമിതാഭ് ചൗധരിയും ബി.സി.സി.ഐ ജനറല്‍ മാനേജര്‍ (ഓപറേഷന്‍) ഡോ. എം.വി ശ്രീധറും പരിശോധിച്ചു. സ്റ്റേഡിയത്തിലെ സൗകര്യങ്ങളില്‍ ബി.സി.സി.ഐ സംഘം പൂര്‍ണ സംതൃപ്തി രേഖപ്പെടുത്തി.
പരുക്കേല്‍ക്കുന്ന താരങ്ങള്‍ക്ക് ചികിത്സ നല്‍കാനുള്ള സൗകര്യങ്ങളിലും ടെലിവിഷന്‍ സംപ്രേഷണത്തിനുള്ള അടിസ്ഥാന സൗകര്യങ്ങളിലും ചില മാറ്റങ്ങള്‍ വരുത്താന്‍ ഡോ. എം.വി ശ്രീധര്‍ നിര്‍ദേശം നല്‍കി. പരുക്കേല്‍ക്കുന്ന താരങ്ങളെ മൈതാനത്ത് നിന്നു മെഡിക്കല്‍ റൂമില്‍ എത്തിക്കുകയും ആവശ്യമെങ്കില്‍ വിദഗ്ധ ചികിത്സയ്ക്കായി ആശുപത്രിയിലേക്ക് മാറ്റുന്നതിനായി ആംബുലന്‍സിലേക്കെത്തിക്കാനും നിലവിലെ സജ്ജീകരണം തടസമാണ്. ഇത് പുനക്രമീകരിക്കുന്നതിനൊപ്പം കാണികളുടെ ഇടപെടല്‍ ഒഴിവാക്കാനുള്ള ക്രമീകരണങ്ങളും ഒരുക്കണം. തത്സമയ സംപ്രേഷണത്തിനായി കാമറകള്‍ സ്ഥാപിക്കാന്‍ നിശ്ചയിച്ചിട്ടുള്ള സ്ഥലങ്ങളില്‍ ചെറിയ മാറ്റങ്ങളും വരുത്തണം. കൂടാതെ കമന്ററി ബോക്‌സിലും പുതിയ ക്രമീകരണങ്ങള്‍ നടത്തണമെന്ന നിര്‍ദേശവും നല്‍കിയിട്ടുണ്ട്.
താരങ്ങളുടെ ഡ്രസിങ് റൂം, ഓഫിഷ്യല്‍സിനുള്ള സൗകര്യം, മീഡിയ റൂം, വി.ഐ.പി ലോഞ്ച്, ഗാലറിയിലെ സൗകര്യങ്ങള്‍ ഉള്‍പ്പടെ ക്രമീകരണങ്ങളില്‍ ഡോ. എം.വി ശ്രീധര്‍ പൂര്‍ണ തൃപ്തി രേഖപ്പെടുത്തി. സ്റ്റേഡിയത്തില്‍ പുനഃക്രമീകരിക്കേണ്ട സജ്ജീകരണങ്ങള്‍ സംബന്ധിച്ച നിര്‍ദേശങ്ങള്‍ ഉടന്‍ തന്നെ കേരള ക്രിക്കറ്റ് അസോസിയേഷന് കൈമാറും. സൗകര്യങ്ങളില്‍ പുനഃക്രമീകരണം നടത്തിയാലുടന്‍ ഐ.സി.സിക്ക് ബി.സി.സി.ഐ റിപോര്‍ട്ട് നല്‍കും. ജൂലൈയില്‍ ഐ.സി.സി സംഘം സ്റ്റേഡിയത്തില്‍ പരിശോധന നടത്തുമെന്ന് അമിതാഭ് ചൗധരി പറഞ്ഞു. ഗ്രീന്‍ഫീല്‍ഡ് സ്റ്റേഡിയം സജ്ജമാണെങ്കിലും ഈ സീസണില്‍ രാജ്യാന്തര മത്സരങ്ങള്‍ ഉണ്ടാവില്ല. ഓക്ടോബറിലാണ് പുതിയ സീസണിന്റെ തുടക്കം. മൂന്ന് പരമ്പരകളാണ് നടക്കാനുള്ളത്. ഇവയില്‍ ഒരു മത്സരം തിരുവനന്തപുരത്തിന് അനുവദിക്കും. ഐ.പി.എല്‍ മത്സരങ്ങള്‍ ഗ്രീന്‍ഫീല്‍ഡില്‍ നടത്തണമോയെന്ന് തീരുമാനിക്കേണ്ടത് ഫ്രാഞ്ചൈസികളാണെന്നും ബി.സി.സി.ഐ ആക്ടിങ് സെക്രട്ടറി അമിതാഭ് ചൗധരി പറഞ്ഞു. ബി.സി.സി.ഐ വൈസ് പ്രസിഡന്റ് ടി.സി മാത്യു, കെ.സി.എ സെക്രട്ടറി ജയേഷ് ജോര്‍ജ് ഉള്‍പ്പടെയുള്ള ഭാരവാഹികളും പങ്കെടുത്തു.