കണ്ണൂര്‍: മോദിയെ ഗാന്ധിയോട് ഉപമിക്കുന്ന എ.പി അബ്ദുല്ലക്കുട്ടിയെ കുതിരവട്ടത്ത് കൊണ്ടുപോകണമെന്ന് കെ.പി.സി.സി വര്‍ക്കിങ് പ്രസിഡന്റ് കെ. സുധാകരന്‍. കഴിഞ്ഞ ദിവസം കോണ്‍ഗ്രസില്‍ നിന്ന് പുറത്താക്കിയ ഘട്ടത്തില്‍ അബ്ദുല്ലക്കുട്ടി നടത്തിയ വിമര്‍ശനങ്ങള്‍ക്ക് മറുപടി പറഞ്ഞായിരുന്നു സുധാകരന്റെ പരിഹാസം. സി.പി.എം വിട്ടുവന്ന നേതാവിനെ നല്ല കോണ്‍ഗ്രസുകാരനാക്കി പരിശീലിപ്പിച്ചെടുക്കുന്നതില്‍ താന്‍ പരാജയപ്പെട്ടു.
സുധീരന്‍ എതിര്‍ത്തപ്പോള്‍ താന്‍ സമ്മര്‍ദം ചെലുത്തിയാണ് അബ്ദുല്ലക്കുട്ടിക്ക് കോണ്‍ഗ്രസില്‍ അംഗത്വം നല്‍കിയത്. സി.പി.എം ഭീഷണി ഉള്ളതിനാല്‍ സുരക്ഷ കണക്കിലെടുത്ത് കണ്ണൂരില്‍ സീറ്റും നല്‍കി. ഒരാളെ പോലും കോണ്‍ഗ്രസിലേക്ക് കൊണ്ടുവരാന്‍ എന്നും ഏകനായ അബ്ദുല്ലക്കുട്ടിക്ക് കഴിഞ്ഞില്ല. സി.പി.എമ്മിനെ പോലെ പാര്‍ട്ടി വിട്ടു പോകുന്നവരുടെ കൈയും കാലും വെട്ടില്ലെന്നും അബ്ദുല്ലക്കുട്ടി ബി.ജെ.പിയില്‍ പോയി നന്നായി വരട്ടെയെന്നും സുധാകരന്‍ കൂട്ടിച്ചേര്‍ത്തു.