മലപ്പുറം: പതിനാലാമതു സമസ്ത ഇസ്‌ലാമിക കലാമേളയുടെ ചാംപ്യന്‍പട്ടം തുടര്‍ച്ചയായ മൂന്നാംതവണയും മലപ്പുറത്തിന്. കാസര്‍കോട്ടു നടന്ന കലാമേളയില്‍ വിദ്യാര്‍ഥി വിഭാഗത്തില്‍ 283 പോയിന്റ് നേടി മലപ്പുറം ഈസ്റ്റ് ജില്ലാ ടീം ഓവറോള്‍ കിരീടം ചൂടി.
ഇന്നലെ കാസര്‍കോട്ടു സമാപിച്ച കലാമേളയുടെ വിദ്യാര്‍ഥി ഫെസ്റ്റില്‍ മലപ്പുറം ഈസ്റ്റ് ജില്ല ഒന്നാംസ്ഥാനം നേടിപ്പോള്‍ മുഅല്ലിം വിഭാഗത്തില്‍ മലപ്പുറം വെസ്റ്റ് ജില്ലയാണ് ഒന്നാമതെത്തിയത്. ജൂനിയര്‍, സീനിയര്‍ വിഭാഗങ്ങളില്‍ ഒന്നും സബ്ജൂനിയര്‍, സൂപ്പര്‍ സീനിയര്‍, മുഅല്ലിം വിഭാഗങ്ങളില്‍ രണ്ടും സ്ഥാനത്തോടെയാണ് ഓവറോള്‍ പട്ടം കരസ്ഥമാക്കിയത്. വിദ്യാര്‍ഥി വിഭാഗത്തില്‍ 15 ഒന്നാംസ്ഥാനങ്ങള്‍, ഒന്‍പതു രണ്ടാം സ്ഥാനങ്ങള്‍, അധ്യാപക മത്സരങ്ങളില്‍ നാല് ഒന്നാം സ്ഥാനം, മൂന്നു രണ്ടാം സ്ഥാനം എന്നിവയും നേടി. കഴിഞ്ഞ രണ്ടു വര്‍ഷങ്ങളിലായി കടമേരി, കോട്ടയം ചെങ്ങനാശ്ശേരി എന്നിവിടങ്ങളില്‍ നടന്ന ഇസ്‌ലാമിക കലാമേളകളിലും മലപ്പുറം ഈസ്റ്റ് ജില്ലയ്ക്കായിരുന്നു ഒന്നാം സ്ഥാനം. ഓവറോള്‍ ചാംപ്യന്‍ഷിപ്പില്‍ 229 പോയിന്റുകളോടെ മൂന്നാം സ്ഥാനം മലപ്പുറം വെസ്റ്റ് ജില്ലയും നേടി. സംസ്ഥാനത്തു കൂടുതല്‍ മദ്‌റസകളുള്ള മലപ്പുറത്ത് ഈസ്റ്റ്, വെസ്റ്റ് വിദ്യാഭ്യാസ ജില്ലകള്‍ തിരിച്ചാണ് പ്രവര്‍ത്തനം. ഇരു വിദ്യാഭ്യാസ ജില്ലകളിലുമായി മദ്‌റസാധ്യാപകരുടെ മേല്‍നോട്ടത്തില്‍ മികച്ച പരിശീലനത്തോടെയാണ് മദ്‌റസാ കലാമേളയില്‍ മലപ്പുറം കുതിപ്പുകാട്ടിയത്. മത്സരത്തില്‍ മികവുറ്റ പ്രകടനം നടത്തിയ അധ്യാപകരെയും വിദ്യാര്‍ഥികളെയും സമസ്ത നേതാക്കള്‍ അഭിനന്ദിച്ചു.