ജിദ്ദ: എണ്ണയിതര വരുമാനം വര്‍ധിപ്പിക്കാന്‍ ലക്ഷ്യമിട്ടു സഊദിയില്‍ നടപ്പാക്കിയ സാമ്പത്തിക പരിഷ്‌കരണത്തിന്റെ ഗുണവും ദോഷവും പഠിച്ചു റിപ്പോര്‍ട്ട് സമര്‍പ്പിക്കണമെന്നു ശൂറാ കൗണ്‍സില്‍.
സാമ്പത്തിക, ആസൂത്രണ മന്ത്രാലയത്തോടാണ് നിര്‍ദേശം. പ്രത്യാഘാതങ്ങളുണ്ടെങ്കില്‍ അതു പരിഹരിക്കാനുള്ള പദ്ധതിയും നിര്‍ദേശിക്കണം.
റിയാദില്‍ ചേര്‍ന്ന ശൂറാ കൗണ്‍സില്‍ യോഗമാണ് സാമ്പത്തിക പരിഷ്‌കരണത്തിന്റെ അനുകൂലവും പ്രതികൂലവുമായ ഘടകങ്ങളെക്കുറിച്ചു പഠിക്കണമെന്നു നിര്‍ദേശിച്ചത്. രാജ്യവ്യാപകമായി എണ്ണയിതര വരുമാനം വര്‍ധിപ്പിക്കാന്‍ ഉദ്ദേശിച്ചു വിനോദം മുതല്‍ വ്യവസായം വരെയുള്ള വിവിധ പദ്ധതികള്‍ പ്രഖ്യാപിച്ചിട്ടുണ്ട്. സാമ്പത്തിക പരിഷ്‌കരണത്തിലൂടെ വലിയ നേട്ടങ്ങളുണ്ട്. അതു പോലെ പ്രത്യാഘാതങ്ങളുമുണ്ടാകാമെന്നു ശൂറ അഭിപ്രായപ്പെട്ടു.
പരിഷ്‌കരണം പ്രത്യാഘാതങ്ങള്‍ സൃഷ്ടിച്ചിട്ടുണ്ടെങ്കില്‍ അതിനുള്ള പരിഹാരം നിര്‍ദേശിക്കണം. പരിഹാര നിര്‍ദേശങ്ങള്‍ എത്രമാത്രം പ്രായോഗികമാക്കിയെന്നത് അടുത്ത റിപ്പോര്‍ട്ടുകളില്‍ കാണിച്ചിരിക്കണമെന്നും ശൂറ നിര്‍ദേശിച്ചു.