നടുവണ്ണൂര്‍: സംസ്ഥാനത്തെ പൊ ലിസ് സംവിധാനം തകരാറിലായെന്ന് ഡി.സി.സി പ്രസിഡന്റ് ടി. സിദ്ദീഖ് പ്രസ്താവിച്ചു. നടുവണ്ണൂരില്‍ മണ്ഡലം കോണ്‍ഗ്രസ് കമ്മിറ്റി സംഘടിപ്പിച്ച പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കണ്ണൂരില്‍ മുഖ്യമന്ത്രിയുടെ സമാധാനക്കരാര്‍ നിലനില്‍ക്കുമ്പോഴും അവിടെ കൊലപാതകം നടക്കുകയാണ്. സംസ്ഥാനത്തെ പൊലിസ് സംവിധാനം തകരാറിലാണ്. കുറ്റം ചെയ്യുന്നവനെ സംരക്ഷിക്കുകയും ഇരയെ വേട്ടയാടുകയുമാണ് ചെയ്യുന്നതെന്നും അദ്ദേഹം കൂട്ടിച്ചേര്‍ത്തു. കോണ്‍ഗ്രസ് മണ്ഡലം പ്രസിഡന്റ് കെ. രാജീവന്‍ അധ്യക്ഷനായി. മണ്ഡലം കോണ്‍ഗ്രസ് കമ്മിറ്റിയുടെ മെംബര്‍ഷിപ്പ് ഉദ്ഘാടനവും ടി. സിദ്ദീഖ് നിര്‍വഹിച്ചു. ഡി.സി.സി ജന. സെക്രട്ടറി ദിനേശ് പെരുമണ്ണ, മുഹമ്മദ് ദിന്‍ഷാന്‍, ഭാസ്‌കരന്‍, പി. സുധാകരന്‍, എ.പി. ഷാജി സംസാരിച്ചു.