നാദാപുരം: സി .പി .എം സംസ്ഥാന സെക്രട്ടറി കോടിയേരി ബാലകൃഷ്ണനെ കാണാന്‍ മഹിജ കണ്ണൂരിലേക്ക് പൊകും.
പാമ്പാടി നെഹറു കോളജില്‍ ദുരൂഹ സാഹചര്യത്തില്‍ മരണപ്പെട്ട തന്റെ മകന്‍ ജിഷ്ണു പ്രണോയിയുടെ മരണവുമായി ബന്ധപ്പെട്ട് മുഖ്യമന്ത്രി കുടുംബത്തിന് നല്‍കിയ ഉറപ്പ് ഒരു മാസമായിട്ടും പാലിക്കപ്പെടാത്ത സാഹചര്യത്തിലാണിതെന്ന് കുടുംബാംഗങ്ങള്‍ പറഞ്ഞു.
സമരം കഴിഞ്ഞ ഉടനെ കോടിയേരി മഹിജയുടെ വീട്ടിലെത്തി എല്ലാ വിധ സഹായവും നല്‍കുമെന്ന ഉറപ്പും നല്‍കിയിരുന്നു. ഇതേ തുടര്‍ന്നാണ് മഹിജയും കുടുംബവും വീണ്ടും കോടിയേരിയെ സമീപിക്കാന്‍ തീരുമാനിച്ചത്. കോടിയേരി കണ്ണൂരില്‍ എത്തുന്ന ദിവസം അദ്ദേഹത്തിന്റെ വീട്ടില്‍ എത്തി കാണാനാണ് തീരുമാനം. ഇതിനു മുന്‍പ് പുതിയ ഡി.ജി.പി ടി.പി സെന്‍ കുമാറിനെ കാണാനും ശ്രമം നടത്തുന്നുണ്ട് .
തിരുവനന്തപുരത്തെ സമരം അവസാനിപ്പിക്കുമ്പോള്‍ സര്‍ക്കാര്‍ നല്‍കിയ ഉറപ്പ് വിശ്വസിച്ച് കുടുംബവും താനും മാസങ്ങളോളം കാത്തിരുന്നു. എന്നിട്ടും ഒരു തീരുമാനം പോലും പാലിക്കാന്‍ സര്‍ക്കാര്‍ തയാറാകാത്തതില്‍ ദുഃഖമുണ്ടെന്നും മഹിജ പറഞ്ഞു.