കാട്ടാക്കട : പ്ലസ്ടു പരീക്ഷയില്‍ 1200ല്‍ 1200ഉം നേടി സുലഭ ഷാജി നാടിന്റെ അഭിമാനമായി. ജില്ലയില്‍ ആകെ 12 വിദ്യാര്‍ഥികളാണ് ഈ നേട്ടം കൈവരിച്ചത്. കാട്ടാക്കട പന്നിയോട് ജലജ ഭവനില്‍ ഷാജി-ജലജ ദമ്പതികളുടെ ഇളയമകളാണ് നാടിന്റെയും സ്‌കൂളിന്റെയും യശ്ശസുയര്‍ത്തിയിരിക്കുന്നത്.
കാട്ടാക്കട കുളത്തുമ്മല്‍ ഹയര്‍ സെക്കന്ററി സ്‌കൂളിലെ വിദ്യാര്‍ഥിനിയായ സുലഭ ബയോളജി സയന്‍സിലാണ് നേട്ടം കൈവരിച്ചത്. മുഴുവന്‍ എ പ്ലസ് ലഭിക്കുമെന്ന് പ്രതീക്ഷിച്ചിരുന്നെങ്കിലും ഇത് അപ്രതീക്ഷിത സമ്മാനമായി. മുഴുവന്‍ മാര്‍ക്ക് നേട്ടം മാതാപിതാക്കള്‍ക്കും ഗുരുജനങ്ങള്‍ക്കും സമര്‍പ്പിക്കുകയാണ് ഈ കൊച്ചു മിടുക്കി.
സ്‌കൂള്‍ ഗണിത ശാസ്ത്രമേളയില്‍ പങ്കെടുത്തു വിജയം കരസ്ഥമാക്കിയിട്ടുള്ള സുലഭ നീറ്റ് പരീക്ഷ എഴുതി ഫലം കാത്തിരിക്കുകയാണ്. നീര്‍മാങ്കര എന്‍ .എസ് .എസ് കോളജ് വിദ്യാര്‍ഥിനി ശലഭ സഹോദരിയാണ്. പ്ലസ് ടുവിന് എല്ലാ വിഷയത്തിനും എ പ്ലസ് നേട്ടം ശലഭവും കരസ്ഥമാക്കിയിരുന്നു.
പിതാവ് ഷാജി പെയിന്റിങ് തൊഴിലാളിയും അമ്മ ജലജ വെള്ളനാട് വെള്ളനാട് കെ.എസ്.ആര്‍.ടി.സി യിലെ താല്‍കാലിക ജീവനക്കാരിയുമാണ്.
സ്‌കൂള്‍ ഹെഡ്മിസ്ട്രസ് മിനി ,പ്രിന്‍സിപ്പാള്‍ രാധാലക്ഷ്മി, ക്ലാസ്സ് ടീച്ചര്‍ ലീന,ശ്രീകല, ലക്ഷ്മി എന്നീ അധ്യാപകരും പി.ടി.എ പ്രസിഡന്റ് എ.പി സജുകുമാര്‍,വൈസ് പ്രസിഡന്റ് വേണു, എക്‌സിക്യൂട്ടീവ് അംഗം രാജന്‍ എന്നിവര്‍ വീട്ടിലെത്തി അഭിനന്ദനം അറിയിച്ചു.