മനാമ: ബഹ്റൈനില്‍ വീട്ടുജോലിക്ക് എത്തിയ യുവതിയെ ക്ഷണിച്ചു വരുത്തി ഫ്ലാറ്റില്‍ പൂട്ടിയിട്ട് അനാശാസത്തിന് പ്രേരിപ്പിച്ച പ്രവാസിയെ തടവും പിഴയും ഈടാക്കി നാടുകടത്താന്‍ കോടതി വിധി.
നിലവില്‍ പോലീസ് കസ്റ്റഡിയില്‍ കഴിയുന്ന പ്രതിയില്‍ നിന്ന് പിഴയായി 2000 ദീനാറും യുവതിയെ നാട്ടിലെത്തിക്കാനുള്ള ചിലവും ഈടാക്കുക, അഞ്ചുവര്‍ഷം തടവിലിട്ട ശേഷം നാടുകടത്തുക എന്നിവയാണ് ബഹ്റൈന്‍ ഒന്നാം ക്രിമിനല്‍ കോടതി വിധിച്ചതെന്ന് പ്രാദേശിക പത്രം റിപ്പോര്‍ട്ട് ചെയ്തു.
ബഹ്റൈന്‍ നിയമമനുസരിച്ച് പ്രതിയുടെയും ഇരയുടെയും പേരുവിവരങ്ങള്‍ പത്രം പുറത്തുവിട്ടില്ല.
ബഹ്റൈനില്‍ വീട്ടുജോലിക്ക് നില്‍ക്കുകയായിരുന്ന യുവതിയെ പ്രതി സോഷ്യല്‍ മീഡിയ വഴി പരിചയപ്പെട്ട് തന്ത്ര പൂര്‍വ്വം തന്‍റെ ഫ്ലാറ്റിലേക്ക് ക്ഷണിച്ചുവരുത്തി ഒരു മുറിയില്‍ പൂട്ടിയിട്ട് അനാശാസ്യത്തിന് നിർബന്ധിക്കുകയായിരുന്നു.
ഇതിനിടെ പ്രതി സ്ഥലത്തില്ലാതിരുന്ന സമയം യുവതി ജനല്‍ വഴി രക്ഷപ്പെട്ട് അടുത്തുള്ള പൊലീസ് സ്റ്റേഷനിലെത്തി വിവരമറിച്ചതിനെ തുടര്‍ന്ന് പോലീസ് എത്തിയാണ് പ്രതിയെ പിടികൂടി അറസ്റ്റ് ചെയ്തത്.
അതേ സമയം യുവതിയെ ബഹ്റൈനിലെത്തിച്ചത് മനുഷ്യക്കടത്തിന്‍റെ ഭാഗമാണെന്നും പിടിയിലായ പ്രവാസിയും മനുഷ്യകടത്ത് കേസില്‍ പ്രതിയാണെന്നും റിപ്പോര്‍ട്ടുണ്ട്.